ബംഗ്ലാദേശിനെതിരായ മൂന്നാം ട്വന്റി ട്വന്റിയില്‍ ഇന്ത്യക്ക് 31 റണ്‍സിന്റെ മികച്ച വിജയം. ഇതോടെ 2-1ന് ഇന്ത്യ പരമ്പര സ്വന്തമാക്കി. ആദ്യം ബാറ്റ് ചെയ്ത ഇന്ത്യ 20 ഓവറില്‍ കെ.എല്‍ രാഹുല്‍ 52 (35), ശ്രേയസ് അയ്യര്‍ 62 (33) തുടങ്ങിയവരുടെ മികച്ച പ്രകടനത്തില്‍ അഞ്ചുവിക്കറ്റിന് 174 റസെടുത്തപ്പോള്‍ ബംഗ്ലാദേശ് 19.2 ഓവറില്‍ 144ന് എല്ലാവരും പുറത്തായി. മുഹമ്മദ് നായിമിന്റെ ഒറ്റയാള്‍ പോരാട്ടത്തില്‍ മികച്ച കളി പുറത്തെടുത്ത ബംഗ്ലാദേശ് അവസാന ഓവറുകളില്‍ ഇന്ത്യന്‍ ബോളിങ്ങിനുമുന്നില്‍ പതറുകയായിരുന്നു.

ശഫീഉല്‍ ഇസ്‌ലാം എറിഞ്ഞ രണ്ടാം ഓവറില്‍ രോഹിത് ശര്‍മ 2 (6)യും അഞ്ചാം ഓവറില്‍ ശിഖര്‍ധവാനും 19 (16) പുറത്തായതോടെ കെ.എല്‍ രാഹുലും ശ്രേയസ് അയ്യറും ഇന്ത്യയെ മുന്നോട്ട് നയിക്കുകയായിരുന്നു. അവസാന ഓവറുകളില്‍ മനിഷ് പാണ്ഡേയുടെ വെടിക്കെട്ട് ബാറ്റിങ്ങ് ഇന്ത്യക്ക് പൊരുതാനുള്ള സ്‌കോര്‍ നല്‍കുകയായിരുന്നു.