വടക്കാഞ്ചേരി: ഓട്ടുപാറ പട്ടണ ഹൃദയത്തിലെ നഗരസഭ ബസ് സ്റ്റാന്റ് നവീകരണ പ്രവര്‍ത്തനങ്ങള്‍ മാസം രണ്ടു പിന്നിട്ടിട്ടും എവിടെയുമെത്താതെ പാതിവഴിയില്‍. ഒരു മാസം കൊണ്ടു നിര്‍മാണം പൂര്‍ത്തിയാക്കി ജനങ്ങള്‍ക്കു തുറന്നു കൊടുക്കുമെന്നു പ്രഖ്യാപിച്ച നഗരസഭ മാസം രണ്ടായിട്ടും ജനദുരിതമകറ്റാന്‍ നടപടി സ്വീകരിയ്ക്കാത്തതു വന്‍ ജനകീയ പ്രതിഷേധം ക്ഷണിച്ചു വരുത്തുന്നു.
സ്റ്റാന്റ് അടച്ചിട്ടിട്ടു രണ്ടു മാസം പിന്നിടുമ്പോള്‍ സ്റ്റാന്റിനുള്ളിലെ വ്യാപാരികളും ജനങ്ങളും ഒരുപോലെ ദുരിതത്തിലാണ്. പ്രവര്‍ത്തനങ്ങള്‍ ഇനി എന്ന് പൂര്‍ത്തിയാക്കുമെന്നു പറയാനാകാതെ നഗരസഭ ഇരുട്ടില്‍ തപ്പുകയുമാണ്.
ഒരു മാസത്തിനുള്ളില്‍ ആധുനിക ബസ് സ്റ്റാന്റ് ജനങ്ങള്‍ക്കു സമര്‍പ്പിക്കുമെന്നായിരുന്നു നഗരസഭയുടെ അവകാശവാദം. 17 ലക്ഷം രൂപയുടെ പദ്ധതിയാണ് നടപ്പിലാക്കുന്നത്. ഇത് ജലരേഖയായി. അതിനിടെ സ്റ്റാന്റിലേക്കു ബസുകള്‍ പ്രവേശിയ്ക്കാത്തതിനാല്‍ പട്ടണ ഹൃദയത്തില്‍ സംസ്ഥാന പാതയുടെ ഇരുവശവും ബസുകള്‍ നിര്‍ത്തിയാണ് ആളുകളെ കയറ്റുന്നതും ഇറക്കുന്നതും. ഇതു മൂലം ഏറെ തിരക്കുള്ള സമയങ്ങളില്‍ സംസ്ഥാന പാതയില്‍ ഗതാഗത കുരുക്ക് രൂക്ഷമാണ്. കിലോമീറ്ററുകള്‍ ദൂരം വാഹനങ്ങള്‍ കുരുക്കില്‍ പെട്ടു കിടക്കുമ്പോള്‍ ജനങ്ങള്‍ അനുഭവിയ്ക്കുന്ന ദുരിതത്തിനു കയ്യും കണക്കുമില്ല.
നഗരസഭയുടെ ദീര്‍ഘവീക്ഷണമില്ലായ്മയാണ് ഇപ്പോഴത്തെ പ്രതിസന്ധിയ്ക്കും ജന ദുരിതത്തിനും കാരണമെന്നാണു പ്രതിപക്ഷ മെമ്പര്‍മാരുടെ ആരോപണം. അടിയന്തരമായി പണി പൂര്‍ത്തീകരിച്ച് ജന ദുരിതത്തിനു പരിഹാരം കണ്ടില്ലെങ്കില്‍ ശക്തമായ പ്രക്ഷോഭം ആവിഷ്‌കരിച്ച് നടപ്പിലാക്കുമെന്നു യു.ഡി.എഫ് നേതാക്കള്‍ അറിയിച്ചു.