പയ്യന്നൂര്‍: പെരുമ്പ ദേശീയപാതയോരത്തെ സുസുക്കി ബൈക്ക് ഷോറൂമില്‍ നിന്നു രണ്ട് ദിവസം മുന്നെ കാണാതായ ബൈക്ക് കണ്ടെത്തി. ബൈക്ക് വാങ്ങാനെന്ന വ്യാജേന തുണികൊണ്ട് മുഖം മറച്ചെത്തിയ യുവാവ് വിവരങ്ങള്‍ ചോദിച്ചറിഞ്ഞ ശേഷം പോവുകയും തൊട്ടടുത്ത ദിവസം തന്നെ ബൈക്ക് കാണാതാവുകയുമായിരുന്നു. കഴിഞ്ഞദിവസം രാവിലെയാണ് ഷോറൂമിന് മുന്നില്‍ കാണാതായ ബൈക്ക് നിര്‍ത്തിയിട്ട നിലയില്‍ കണ്ടെത്തിയത്.
ബൈക്കിന്റെ സീറ്റിന്റെ ഇടയില്‍ ഷോറൂം മാനേജര്‍ക്ക് ഒരു കത്തും തിരുകി വച്ചിട്ടുണ്ടായിരുന്നു. എനിക്ക് ഈ ബൈക്കിനോടുള്ള ആഗ്രഹം കൊണ്ട് അമിതാവേശത്താല്‍ എടുത്തതാണെന്നും പൊലിസില്‍ പരാതിപ്പെടരുതെന്നും കത്തിലുണ്ടായിരുന്നു. ബൈക്കും കത്തും പൊലിസ് കസ്റ്റഡിയിലാണ്.
 കഴിഞ്ഞദിവസം പയ്യന്നൂര്‍ കോര്‍പറേഷന്‍ ബാങ്കിന്റെ എ.ടി.എം കൗണ്ടറില്‍ നടന്ന കവര്‍ച്ചാശ്രമം സി.സി കാമറയില്‍ പതിഞ്ഞിരുന്നു. ഈ ദൃശ്യങ്ങള്‍ ശേഖരിച്ച് രണ്ടും ഒരാള്‍ തന്നെയാണോ എന്നുള്ള അന്വേഷണത്തിലാണ് പൊലിസ്.