സ്വന്തം ലേഖകന്‍
തിരുവനന്തപുരം: 2025ഓടെ കേരളം സമ്പൂര്‍ണ ക്ഷയരോഗ മുക്തമാകുമെന്ന് ലോകാരോഗ്യ സംഘടനയുടെ വിലയിരുത്തല്‍. കേരളത്തിലെ ക്ഷയരോഗ നിര്‍മാര്‍ജന പരിപാടികള്‍ ലോകത്തിന് മാതൃകയാണെന്നും ലോകാരോഗ്യ സംഘടന പ്രതിനിധികള്‍ വ്യക്തമാക്കി.
നവംബര്‍ 11 മുതല്‍ 15 വരെ കേരളത്തിലെ വിവിധ പ്രദേശങ്ങള്‍ സന്ദര്‍ശിച്ച് പ്രവര്‍ത്തനങ്ങള്‍ വിലയിരുത്തിയ ശേഷമാണ് സംഘം ഇക്കാര്യം വ്യക്തമാക്കിയത്. ലോകാരോഗ്യ സംഘടനയുടെ വിദഗ്ധ സംഘം ഇതുസംബന്ധിച്ച റിപ്പോര്‍ട്ട് ആരോഗ്യ മന്ത്രി കെ.കെ ശൈലജക്ക് കൈമാറി.
വയനാട്, തൃശൂര്‍, എറണാകുളം, കോഴിക്കോട്, തിരുവനന്തപുരം എന്നീ ജില്ലകളിലാണ് സംഘം പഠനം നടത്തിയത്. ലോകാരോഗ്യ സംഘടനാ പ്രതിനിധികളായ യു.എസ്.എ.ഐ.ഡി അഡൈ്വസര്‍ അമിപിയാട്ടിക്, സി.ഡി.സി ടെക്‌നിക്കല്‍ കണ്‍സള്‍ട്ടന്റ് ക്രിസ്റ്റിന ഹോ, ഇന്‍സ്റ്റിറ്റ്യൂട്ട് ഓഫ് യൂനിയന്‍ സൗത്ത് ഈസ്റ്റ് ഏഷ്യ ഡയരക്ടര്‍ ജയിനി ടോണ്‍സിങ്, നാഷനല്‍ ഇന്‍സ്റ്റിറ്റ്യൂട്ട് ഓഫ് ടി.ബി മുന്‍ ഡയരക്ടര്‍ ഡോ. പ്രഹ്ലാദ്കുമാര്‍, ഡോ. പി.എസ് രാകേഷ് എന്നിവരാണ് മന്ത്രി ശൈലജയെ സന്ദര്‍ശിച്ച് റിപ്പോര്‍ട്ട് നല്‍കിയത്.