അലഹബാദ്: പഞ്ചാബില്‍ ദലിത് യുവാവിനെ അടിച്ചു കൊന്നു. 37 കാരനായ ജഗ്മലെ സിങ് ആണ് കൊല്ലപ്പെട്ടത്. സങ്കൂര്‍ജില്ലയിലെ ചങ്കലിവാലയില്‍ നിന്നുള്ള തൊഴിലാളിയായിരുന്നു ഇയാള്‍. അക്രമികള്‍ അതിക്രൂരമായി മര്‍ദ്ദിക്കുകയും അതിന് ശേഷം മൂത്രം കുടിപ്പിക്കുകയും ചെയ്തിരുന്നു. മര്‍ദ്ദനത്തെ തുടര്‍ന്ന് ഇയാളുടെ കാലുകള്‍ മുറിച്ചു മാറ്റേണ്ടി വന്നിരുന്നു.

സംഭവത്തില്‍ നാലുപേരെ അറസ്റ്റ് ചെയ്തിട്ടുണ്ട്. ഇതേ ഗ്രാമത്തില്‍ നിന്നുള്ളവര്‍ തന്നെയാണ് അറസ്റ്റിലായത്.

ഇയാളും റിങ്കു എന്നൊരാളും തമ്മില്‍ വാക്കേറ്റമുണ്ടായിരുന്നു. ഇത് ഗ്രമവാസികള്‍ ഇടപെട്ട് പരിഹരിച്ചിരുന്നു. എന്നാല്‍ പിന്നീട് ഇയാളെ റിങ്കു വീട്ടിലേക്ക് വിളിപ്പിച്ചതായും അവിടെ വെച്ച് മര്‍ദ്ദനത്തിനിരയായതായുമാണ് റിപ്പോര്‍ട്ട്. നാലുപേര്‍ തൂണില്‍ കെട്ടിയിട്ട് മര്‍ദ്ദിച്ചെന്നും മൂത്രം കുടിപ്പിച്ചെന്നും ഇയാള്‍ പൊലിസിന് മൊഴിനല്‍കിയിരുന്നു.

അറസ്റ്റിലായവര്‍ക്കെതിരെ തട്ടിക്കൊണ്ടുപോകലിനും പട്ടിക ജാതിക്കാര്‍ക്കെതിരായ ആക്രമണത്തിനും കേസെടുത്തിട്ടുണ്ട്.