ലഖ്‌നൗ: ബാബരി മസ്ജിദ് നിലനിന്ന ഭൂമി ഹിന്ദുക്കള്‍ക്ക് വിട്ടുകൊടുത്ത് സുപ്രിംകോടതിയുടെ ഭരണഘടന ബെഞ്ച് പുറപ്പെടുവിച്ച ഉത്തരവിന്റെ പശ്ചാത്തലത്തില്‍ സുപ്രധാന തീരുമാനവുമായി മുസ്ലിം പെഴ്‌സനല്‍ ലോ ബോര്‍ഡിന്റെ നിര്‍ണായക യോഗം. അയോധ്യക്കു പുറത്ത് പള്ളി നിര്‍മിക്കാന്‍ അനുവദിച്ച അഞ്ചേക്കര്‍ ഭൂമി വേണ്ടെന്നും സുപ്രിംകോടതിയുടെ ഉത്തരവിനെതിരെ പുനപ്പരിശോധനാ ഹരജി നല്‍കുമെന്നും ബോര്‍ഡ് യോഗം അറിയിച്ചു. ലഖ്‌നൗവിലെ പ്രശസ്തമായ ദയൂബന്ത് ദാറുല്‍ ഉലൂമില്‍ ചേര്‍ന്ന ബോര്‍ഡിന്റെ നിര്‍വാഹകസമിതി യോഗത്തിലാണ് തീരുമാനം ഉണ്ടായത്.

യോഗ തീരുമാനങ്ങള്‍ ബോര്‍ഡ് സെക്രട്ടറിയും മുതിര്‍ന്ന അഭിഭാഷകനുമായ സഫരിയാബ് ജീലാനിയും മുതിര്‍ന്ന നിര്‍വാഹക സമിതിയംഗം എസ്.ക്യു.ആര്‍ ഇല്യാസുമാണ് വിശദീകരിച്ചത്. പള്ളിയുടെ ഭൂമി അല്ലാഹുവിന്റെതാണ്. അത് ഒരാള്‍ക്കു നല്‍കാന്‍ കഴിയില്ല. ആ പള്ളിക്ക് പകരം മറ്റരു പള്ളി സാധ്യവുമല്ല- സഫരിയാബ് ജിലാനി പറഞ്ഞു.

നാലര നൂറ്റാണ്ട് കാലം മുസ്‌ലിംകള്‍ നിസ്‌കാരം നിര്‍വഹിച്ചുപോന്ന പള്ളി ഹിന്ദുക്കള്‍ക്ക് വിട്ടുകൊടുത്തത് വഴി രാഷ്ട്രത്തിന്റെ മനസ്സാക്ഷിക്കേറ്റ മുറിവ് ഭേദമാക്കാനോ അതുമൂലമുള്ള മാനക്കേട് പരിഹരിക്കാനോ അഞ്ചേക്കര്‍ ഭൂമികൊണ്ട് സാധിക്കില്ലെന്ന് യോഗം വിലയിരുത്തി. ഇസ്‌ലാമിക നിയമം അനുസരിച്ച് പള്ളിക്കായി വഖ്ഫ് ചെയ്ത ഭൂമി മറ്റൊരു ഭൂമിക്ക് പകരം കൈമാറാന്‍ ആവില്ല. പള്ളികള്‍ അടിസ്ഥാന മതവിശ്വാസത്തിന്റെ ഒഴിച്ചുകൂടാനാവാത്ത ഘടകമാണ്. ഒരു പള്ളി തകര്‍ക്കപ്പെട്ട ശേഷം അതുപോലെ മറ്റൊരുസ്ഥലത്ത് നിര്‍മിക്കുന്നത് ഇസ്‌ലാമിക നിയമപ്രകാരം സാധ്യമല്ല. അതിനാല്‍ കോടതി വാഗ്ദാനംചെയ്ത അഞ്ചേക്കര്‍ ഭൂമി ഞങ്ങള്‍ നിരസിക്കുകയാണ്. ഈ നിലപാട് സുന്നി വഖ്ഫ് ബോര്‍ഡും സ്വീകരിക്കുമെന്നാണ് ഞങ്ങള്‍ പ്രതീക്ഷിക്കുന്നത്. മത ചിഹ്നങ്ങളും മത സ്ഥാപനങ്ങളും വിദ്യാഭ്യാസ സ്ഥാപനങ്ങളും ഖബര്‍സ്ഥാനുകളും സംരക്ഷിക്കുന്ന കാര്യത്തില്‍ മറ്റുസമുദായങ്ങളുടെതെന്ന പോലെ മുസ്ലിംകളുടെ കാര്യത്തിലും സര്‍ക്കാര്‍ തുല്യത പാലിക്കുമെന്നാണ് ഞങ്ങള്‍ പ്രതീക്ഷിക്കുന്നതെന്നും യോഗം സര്‍ക്കാരിനോട് അഭ്യര്‍ഥിച്ചു.

യോഗത്തിന് മുന്നോടിയായി ബാബരി മസ്ജിദ് വിഷയത്തില്‍ സമസ്ത കേരള ജംഇയ്യത്തുല്‍ ഉലമ മുന്നോട്ടുവച്ച അഞ്ചിന നിര്‍ദേശങ്ങള്‍ ബോര്‍ഡ് മുന്‍പാകെ വച്ചിരുന്നു. പുനപ്പരിശോധന ഹരജി നല്‍കുക, ബാബരി മസ്ജിദ് നിലനിന്നിരുന്ന വഖ്ഫ് ഭൂമിക്ക് പകരം മറ്റൊരു അഞ്ച് ഏക്കര്‍ ഭൂമി നല്‍കാനുള്ള സുപ്രിംകോടതിയുടെ നിര്‍ദേശം സ്വീകരിക്കണമോ എന്നത് ഗൗരവമായി ചര്‍ച്ച നടത്തുകയും കഴിയുംവിധം സൗഹാര്‍ദപൂര്‍വം നിരസിക്കുകയും ചെയ്യുക തുടങ്ങിയ നിര്‍ദേശങ്ങളാണ് സമസ്ത മുന്നോട്ടുവച്ചത്. ഈ രണ്ട് ആവശ്യങ്ങളും ഇന്നലത്തെ യോഗം അംഗീകരിച്ചു. മറ്റു നിര്‍ദേശങ്ങള്‍ സംബന്ധിച്ച് അടുത്ത യോഗത്തില്‍ ചര്‍ച്ചചെയ്യുമെന്ന് ബോര്‍ഡ് വൃത്തങ്ങള്‍ അറിയിച്ചു. ഇന്നലത്തെ യോഗത്തില്‍ വിഷയത്തിലെ സമസ്തയുടെ നിലപാട് ജനറല്‍ സെക്രട്ടറി പ്രൊഫ. ആലിക്കുട്ടി മുസ്‌ലിയാര്‍ സംസാരിക്കുകയം ചെയ്തു.

30 ദിവസത്തിനുള്ളില്‍ തന്നെ പുനപ്പരിശോധന ഹരജി നല്‍കാനാണ് ബോര്‍ഡിന്റെ തീരുമാനം. യോഗത്തില്‍ സുന്നി വഖ്ഫ് ബോര്‍ഡ് പ്രതിനിധികള്‍ പങ്കെടുത്തിരുന്നില്ല. പ്രധാനമായും ബാബരി മസ്ജിദ് വിഷയം മാത്രം ചര്‍ച്ചചെയ്ത യോഗത്തില്‍, പുനപ്പരിശോധന ഹരജി നല്‍കുന്ന കാര്യത്തില്‍ ഒരുവിഭാഗം അംഗങ്ങള്‍ എതിര്‍പ്പ് അറിയിച്ചിരുന്നു. കേസ് നീട്ടിക്കൊണ്ടുപോവേണ്ടതില്ലെന്ന നിലപാടാണ് ഈ വിഭാഗം സ്വീകരിച്ചത്. ഇതോടെ ബോര്‍ഡ് തിരഞ്ഞെടുത്ത നാലംഗസമിതിയാണ് പുനപ്പരിശോധന ഹരജി നല്‍കുന്നതടക്കമുള്ള തീരുമാനങ്ങള്‍ കൈക്കൊണ്ടത്. മറ്റു കാര്യങ്ങള്‍ പിന്നീട് ചര്‍ച്ചചെയ്യാന്‍ തീരുമാനിച്ച് വൈകീട്ടോടെ യോഗം പിരിയുകയായിരുന്നു. ഭരണഘടനാ ബെഞ്ചിന്റെ വിധിയിലെ പിഴവുകള്‍ സംബന്ധിച്ച് ബോര്‍ഡിനു കീഴിലെ നിയമസമിതി കൂടിയാലോചിക്കും. ഇതിന് ശേഷമാവും പുനപ്പരിശോധന ഹരജി നല്‍കുക.

യോഗത്തില്‍ ബോര്‍ഡ് പ്രസിഡന്റ് സയ്യിദ് മുഹമ്മദ് റാബിഅ് അല്‍ഹസന്‍ നദ്‌വി അധ്യക്ഷതവഹിച്ചു. കെ. ആലിക്കുട്ടി മുസ്‌ലിയാരെ കൂടാതെ, കേരളത്തില്‍ നിന്ന് ഇ.ടി മുഹമ്മദ് ബഷീര്‍, മൗലവി അല്‍ഹാഫിസ് അബ്ദുല്‍ ശുക്കൂര്‍ അല്‍ഖാസിമി, അഡ്വ. മുഹമ്മദ് ത്വയ്യിബ് ഹുദവി എന്നിവരും പങ്കെടുത്തു.

personal law board will file a review petition against the ayodhya verdict