ഇതുവരെയായി ബഹ്റൈനില്‍ നിന്നും കണ്ണൂരിലേക്ക് ഒരു വിമാന സര്‍വീസ് പോലും ഏര്‍പ്പെടുത്തിയിട്ടില്ലാത്തതിനാല്‍ വിവിധ പ്രവാസി സംഘടനകളാണ്  ഈ ആവശ്യവുമായി രംഗത്തെത്തിയിട്ടുള്ളത്.  ഇക്കാര്യത്തിലുള്ള അധികൃതരുടെ സമീപനം ബഹ്റൈനിലെ മലയാളി സമൂഹത്തിനു നിരാശയുണ്ടാക്കിയതായി ബഹ്റൈന്‍ യാത്രാ സമിതി വാര്‍ത്താകുറിപ്പില്‍ അറിയിച്ചു. മലബാര്‍ ഭാഗത്തുള്ളവര്‍ക്കും, കര്‍ണാടക ബോര്‍ഡറില്‍ ഉള്ളവര്‍ക്കും ഗുണം ചെയ്യുന്ന രൂപത്തില്‍ നേരിട്ടോ കണക്ഷന്‍ ഫ്‌ളൈറ്റ് വഴിയോ യാത്ര സൗകര്യം  ഒരുക്കണമെന്ന് ആവശ്യപ്പെട്ട് യാത്ര സമിതി കേന്ദ്ര - കേരള അധികാരികള്‍ക്ക്  നിവേദനവും സമര്‍പ്പിച്ചിട്ടുണ്ട്. 

ബഹ് റൈൻ കെ.എം.സി.സി.കണ്ണൂർ ജില്ലാ കമ്മിറ്റിയും ഇതു സംബന്ധിച്ച് എയർ ഇന്ത്യാ എക്സ്പ്രസ്സ് അധികൃതർക്ക് നിവേദനം നൽകിയിട്ടുണ്ട്.

ബഹ്റൈനിലെ എയർ ഇന്ത്യ എക്സ്പ്രസ് റീജിയണൽ ഓഫീസിൽ നേരിട്ടെത്തി കെ.എം.സി.സി ജില്ലാ പ്രസിഡണ്ട് നൂറുദ്ദീൻ മുണ്ടേരി എയർ ഇന്ത്യ എക്സ്പ്രസ്സ് ബഹ്റൈൻ മാനേജർ സാകത് സാറിനാണ് നിവേദനം കൈമാറിയത്.
കണ്ണൂർ എയർപോർട്ട് പരിധിയിലുള്ള ബഹ്റൈൻ പ്രവാസികളുടെ ഈ ആവശ്യം അനുഭാവ പൂർവ്വം പരിഗണിക്കുമെന്ന് അദ്ധേഹം നേതാക്കൾക്ക് ഉറപ്പ് നൽകിയതായും ഭാരവാഹികള്‍ അറിയിച്ചു.

ചടങ്ങില്‍ എയര്‍ ഇന്ത്യാ മാനേജർക്കു പുറമെ എയർ ഇന്ത്യാ എക്സ്പ്രസ്സ് സെയിൽസ് മാനേജർ നാരായണ മേനോൻ, സെയിൽസ് എക്സിക്യുട്ടീവ് അഫ്സൽ ഇമ്രാൻ, കെ.എം.സി.സി.കണ്ണൂർ ജില്ലാ ട്രഷറർ ശംസുദ്ദീൻ പാനൂർ, വൈസ് പ്രസിഡണ്ട് നിസാർ ഉസ്മാൻ, സെക്രട്ടറിമാരായ നൂറുദ്ദീൻ മാട്ടൂൽ ,അഷ്റഫ് കാക്കണ്ടി എന്നിവരും പങ്കെടുത്തു.