സ്‌പോട്‌സ് ലേഖകന്‍

മാങ്ങാട്ടുപറമ്പ്: 200 മീറ്ററിന്റെ ട്രാക്കിനെയും ചുട്ടുപൊള്ളിച്ചു ആന്‍സി സോജന്‍ കുതിച്ചപ്പോള്‍ പൊന്നുമാത്രമല്ല റെക്കോര്‍ഡും പിറന്നു. തൃശൂരും പാലക്കാടും തിരുവനന്തപുരവും കോഴിക്കോടും കരുത്തുകാട്ടിയ 200 മീറ്ററിന്റെ ട്രാക്കില്‍ തീപാറിയ പോരാട്ടമാണ് നടന്നത്. ചാംപ്യന്‍ഷിപ്പില്‍ ട്രിപ്പിള്‍ സ്വര്‍ണവും റെക്കോര്‍ഡും കുറിച്ചാണ് നാട്ടിക ഫിഷറീസ് സ്‌കൂളിലെ ആന്‍സി സോജന്‍ തന്റെ അവസാന സ്‌കൂള്‍ കായികമേളയെ അവിസ്മരണീയമാക്കിയത്. സീനിയര്‍ പെണ്‍കുട്ടികളില്‍ ആന്‍സി 24.53 സെക്കന്‍ഡിലാണ് റെക്കോര്‍ഡുമായി ഫിനിഷ് ലൈന്‍ കടന്നത്. 2015 ല്‍ ജിസ്‌ന മാത്യു സ്ഥാപിച്ച 24.76 സെക്കന്‍ഡിന്റെ റെക്കോര്‍ഡ് പഴങ്കഥയായി. 

100 മീറ്ററിലും ലോങ്ജംപിലും റെക്കോര്‍ഡോടെ ആന്‍സി സ്വര്‍ണം നേടിയിരുന്നു. കോട്ടയം സെന്റ് പീറ്റേഴ്‌സ് കുറുമ്പനാടം താരം പി.ഡി അഞ്ജലി (25.70) വെള്ളിയും എറണാകുളം സേക്രഡ് ഹേര്‍ഡ്‌സിന്റെ ഗൗരി നന്ദന (25.88) വെങ്കലവും നേടി. ആണ്‍കുട്ടികളില്‍ സായ് താരം അഖില്‍ ബാബു 22.46 സെക്കന്‍ഡില്‍ പൊന്നണിഞ്ഞു. തൃശൂര്‍ കോണ്‍കോര്‍ഡ് ഇംഗ്ലീഷ് സ്‌കൂളിലെ മുഹമ്മദ് സജീവ് (22.58)  വെള്ളിയും നേടിയപ്പോള്‍ പാലക്കാട് കല്ലടി കുമരംപുത്തൂരിന്റെ മുഹമ്മദ് ഷനൂബ് (22.80) വെങ്കലക്കുതിപ്പ് നടത്തി. 

ജൂനിയര്‍ ആണ്‍കുട്ടികളില്‍ പാലക്കാട് മാത്തൂരിന്റെ കെ. അഭിജിത് 22.66 സെക്കന്‍ഡിലാണ് സ്വര്‍ണക്കുതിപ്പ് നടത്തിയത്. മലപ്പുറം ഐഡിയല്‍ കടകശേരിയിലെ മുഹമ്മദ് ഷാന്‍ (22.94) വെള്ളിയും പാലക്കാട് ചിറ്റിലഞ്ചേരിയുടെ മുഹമ്മദ് ഫാസല്‍ (23.03) വെങ്കലവും സ്വന്തമാക്കി. പെണ്‍കുട്ടികളില്‍ എസ്.എം.വി പൂഞ്ഞാറിലെ സാന്ദ്ര മോള്‍ സാബു 25.58 സെക്കന്‍ഡില്‍ സ്വര്‍ണക്കുതിപ്പ് നടത്തി. സാന്ദ്രയും സ്പ്രിന്റ് ഡബിള്‍ തികച്ചു. കൊല്ലം സായിയിലെ നയനാ ജോസ് (26.77) വെള്ളിയും കോഴിക്കോട് പുല്ലൂരാംപാറയുടെ സാനിയ ട്രീസ ടോമി (26.79) വെങ്കലവും നേടി. സബ് ജൂനിയര്‍ വിഭാഗത്തില്‍ തിരുവനന്തപുരം ശ്രീ അയ്യങ്കാളി സ്‌കൂളിലെ എ.കെ വിഷ്ണുവിനാണ് സ്വര്‍ണം. 24.28 സെക്കന്‍ഡിലായിരുന്നു ഫിനിഷ് ചെയ്തത്. വയനാട് കാട്ടികുളം സ്‌കൂളിലെ പി.എസ് രമേശ് (24.57) വെള്ളിയും പാലക്കാട് കല്ലടി കുമരംപുത്തൂരിന്റെ നോയിറം നെറോം ചിങ്ഗായി സിങ് (24.93) വെങ്കലവും നേടി. പെണ്‍കുട്ടികളില്‍ ശാരിക സുനില്‍കുമാര്‍ 26.75 സെക്കന്‍ഡില്‍  സ്വര്‍ണം നേടി. പാലക്കാട് കാണിക്കമാതാ സ്‌കൂളിലെ ജി. താര (27.18) വെള്ളിയും കോഴിക്കോട് സെന്റ് ജോസഫ്‌സ് പുല്ലൂരാംപാറയുടെ ജെ.എസ് നിവേദ്യ (27.63) വെങ്കലവും നേടി