കണ്ടശ്ശാംകടവ്:  പൊതു വിദ്യഭ്യാസ നയത്തിന്റ  ഉപജ്ഞാതാവും പ്രഥമ  വിദ്യഭ്യാസ വകുപ്പ് മന്ത്രിയുമായ പ്രൊഫ. ജോസഫ് മുണ്ടശ്ശേരിയുടെ സ്മരണ നില നിര്‍ത്തുന്ന തരത്തില്‍ കണ്ടശ്ശാംകടവ്  സ്‌കൂള്‍ സ്മാരകമാക്കി സംരക്ഷിക്കുമെന്ന് മന്ത്രി പ്രൊഫ. സി. രവീന്ദ്രനാഥ്  പറഞ്ഞു. കഴിഞ്ഞ ദിവസം തകര്‍ന്നു വീണ കണ്ടശ്ശാംകടവ് പി.ജെഎം. ഗവ. ഹയര്‍ സെക്കന്‍ഡറി സ്‌കൂള്‍  സന്ദര്‍ശിക്കുകയായിരുന്നു വിദ്യഭ്യാസ വകുപ്പ് മന്ത്രി. പ്രൊഫ. സി. രവീന്ദ്രനാഥ്.
സാംസ്‌കാരിക കേന്ദ്രവും ലൈബ്രററിയും കൂട്ടി ചേര്‍ത്ത് ഉചിതമായ സ്മാരകമാണ് നിര്‍മ്മിക്കുകയെന്ന്  മന്ത്രി സൂചിപ്പിച്ചു.  കാലോചിതമായ കെട്ടിടങ്ങള്‍ നവീകരിക്കാത്തതാണ് മേല്‍ക്കൂര തകരാന്‍ കാരണം.
പഴയ കെട്ടിടത്തിന് പകരം  പുതിയവ അടിയന്തിരമായി നിര്‍മിക്കും. എത്തരത്തിലുള്ളത് വേണമെന്ന്  ആസൂത്രണം ചെയ്യേണ്ടത് ജനപ്രതിനിധികളും സ്‌കൂള്‍ വികസന സമിതിയും  പി.ടി.എയുമാണ്.
ആവശ്യമായ ഫണ്ട്  സര്‍ക്കാരില്‍ നിന്നനുവദിക്കുമെന്ന് മന്ത്രി  പ്രൊഫ. സി.രവീന്ദ്രനാഥ് പറഞ്ഞു.  മുരളീപെരുനെല്ലി എം.എല്‍.എ, ജില്ലാ പഞ്ചായത്ത് പ്രസിഡന്റ്  ഷീല വിജയകുമാര്‍, ജില്ലാ പഞ്ചായത്ത് സ്റ്റാന്റിങ്ങ് കമ്മിറ്റി ചെയര്‍മാന്‍ മഞ്ജുള അരുണന്‍, അംഗം സിജി മോഹന്‍ദാസ്, മണലൂര്‍ പഞ്ചായത്ത് പ്രസിഡന്റ് സീത ഗണേഷ്, മുന്‍ പഞ്ചായത്ത് പ്രസിഡന്റ്  കെ.വി. വിനോദന്‍, പി.ടി.എ പ്രസിഡന്റ് വി.എന്‍. സുര്‍ജിത്ത്, ജനപ്രതിനിധികള്‍, പൂര്‍വ്വ വിദ്യാര്‍ഥികള്‍ എന്നിവര്‍ മന്ത്രിയെ സ്വീകരിച്ചു.