തിരുവനന്തപുരം: തലസ്ഥാനത്തെ രാഷ്ട്രീയ സംഘര്‍ഷങ്ങളുടെ പശ്ചാത്തലത്തില്‍ ചേര്‍ന്ന ബി.ജെ.പി- സി.പി.എം ചര്‍ച്ച അവസാനിച്ചു. അക്രമ സംഭവങ്ങള്‍ ആവര്‍ത്തിക്കരുതെന്ന് ചര്‍ച്ചയില്‍ മുഖ്യമന്ത്രി ആവശ്യപ്പെട്ടു.

ഏതെങ്കിലും സംഭവങ്ങളുടെ പേരില്‍ പാര്‍ട്ടി ഓഫിസുകളോ സംഘടനാ ഓഫിസുകളോ ആക്രമിക്കാൻ പാടില്ല. തിരുവനന്തപുരത്ത് അത്യന്തം നിര്‍ഭാഗ്യകരമായ സംഭവങ്ങളാണ് നടന്നത്. അതില്‍ അപലപിക്കുന്നുവെന്നും മുഖ്യമന്ത്രി അറിയിച്ചു.

രാഷ്ട്രീയ സംഘര്‍ഷം പടരാതിരിക്കാന്‍ ആവശ്യമായ നടപടികള്‍ കൈക്കൊള്ളുമെന്ന് സി.പി.എമ്മും ബി.ജെ.പിയും ഉറപ്പുനല്‍കിയതായി മുഖ്യമന്ത്രി പിണറായി വിജയന്‍ പറഞ്ഞു.ഇതിനായി ഇരു കൂട്ടരും അണികളെ ബോധവല്‍ക്കരിക്കാനുള്ള നടപടികള്‍ സ്വീകരിക്കുമെന്നും യോഗത്തില്‍ തീരുമാനിച്ചു.

തിരുവനന്തപുരത്ത് ഉണ്ടായ സംഭവങ്ങളുമായി ബന്ധപ്പെട്ട് ഓഗസ്റ്റ് ആറാം തിയതി വൈകിട്ട് മൂന്നു മണിക്ക് സര്‍വകക്ഷി യോഗം ചേരുമെന്നും മുഖ്യമന്ത്രി വ്യക്തമാക്കി.സംഘര്‍ഷസാധ്യത നിലനില്‍ക്കുന്ന കണ്ണൂരിലും കോട്ടയത്തും തിരുവനന്തപുരത്തും ബി.ജെ.പി -സി.പി.എം ഉഭയകക്ഷി ചര്‍ച്ച നടത്താനും സമാധാനചര്‍ച്ചയില്‍ തീരുമാനമായി.

അതേസമയം സമാധാനചര്‍ച്ചയില്‍ നിന്ന് മാധ്യമപ്രവര്‍ത്തകരെ പുറത്താക്കിയ നടപടിയില്‍ പ്രതികരിക്കാന്‍ മുഖ്യമന്ത്രി തയ്യാറായില്ല.

സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍, ബി.ജെ.പി സംസ്ഥാന അധ്യക്ഷന്‍ കുമ്മനം രാജശേഖരന്‍, ആര്‍.എസ്എസ് പ്രാന്ത കാര്യവാഹക് ഗോപാലന്‍കുട്ടി മാസ്റ്റര്‍, ഒ. രാജഗോപാല്‍ എം.എല്‍.എ തുടങ്ങിയവര്‍ യോഗത്തില്‍ പങ്കെടുത്തു.