മുക്കം: പ്രളയബാധിതര്‍ക്ക് വിതരണം ചെയ്യുന്നതിനായി ജില്ലാ ഭരണകൂടം നല്‍കിയ ദുരിതാശ്വാസ സാധനങ്ങള്‍ പൂഴ്ത്തിവച്ചതായി കണ്ടെത്തി. ഭക്ഷ്യവസ്തുക്കളും വസ്ത്രങ്ങളും പാത്രങ്ങളും ഉള്‍പ്പെടെയുള്ള സാധനങ്ങള്‍ അടങ്ങിയ കിറ്റുകളാണ് കാരശ്ശേരി പഞ്ചായത്തിലെ രണ്ടു സാംസ്‌കാരിക നിലയങ്ങളില്‍ പൂഴ്ത്തിവച്ചതായി കണ്ടെത്തിയത്. 175 ഓളം പെട്ടികളിലായാണ് കറുത്തപറമ്പിലെയും കാരശ്ശേരിയിലെയും സാംസ്‌കാരിക നിലയങ്ങളില്‍ കിറ്റുകള്‍ അടുക്കിവച്ചിരിക്കുന്നത്. കഴിഞ്ഞ ദിവസം അര്‍ധരാത്രിയില്‍ കറുത്തപറമ്പിലെ സാംസ്‌കാരിക നിലയത്തില്‍ വാര്‍ഡ് മെംബറെയും മറ്റൊരാളെയും കണ്ടതോടെ നടത്തിയ പരിശോധനയിലാണ് ഇവിടങ്ങളില്‍ നിരവധി പെട്ടികളിലായി സൂക്ഷിച്ച കിറ്റുകള്‍ കണ്ടെത്തിയതെന്ന് നാട്ടുകാര്‍ പറഞ്ഞു. നേരത്തെ ഇവിടെനിന്ന് ബോക്‌സുകള്‍ കടത്തിക്കൊണ്ടുപോകുന്നത് ശ്രദ്ധയില്‍പെട്ടിട്ടുണ്ടെന്നും ഞായറാഴ്ച രാത്രിയും ഇതു കണ്ടതോടെ സാംസ്‌കാരിക നിലയം താഴിട്ടു പൂട്ടുകയായിരുന്നുവെന്നും നാട്ടുകാര്‍ പറഞ്ഞു. തുടര്‍ന്ന് പഞ്ചായത്ത് സെക്രട്ടറി സ്ഥലത്തെത്തി പരിശോധന നടത്തുകയും പെട്ടികളുടെ എണ്ണം തിട്ടപ്പെടുത്തി ഇരു സ്ഥാപനങ്ങളും സീല്‍ ചെയ്യുകയായിരുന്നു. വിവരമറിഞ്ഞ് പ്രദേശത്ത് തടിച്ചുകൂടിയ യു.ഡി.എഫ് പ്രവര്‍ത്തകര്‍ പ്രകടനം നടത്തി. അതേസമയം സംഭവത്തില്‍ വിശദീകരണവുമായി കാരശ്ശേരി പഞ്ചായത്ത് പ്രസിഡന്റ് വി.കെ വിനോദ് രംഗത്തെത്തി. 3,000 കിറ്റുകള്‍ നല്‍കുമെന്നറിയിച്ചതിനെ തുടര്‍ന്നാണ് കിറ്റുകള്‍ വാങ്ങിയതെന്നും എന്നാല്‍ കിട്ടിയപ്പോള്‍ വളരെ കുറഞ്ഞുപോയതു കൊണ്ടാണ് വിതരണം ചെയ്യാതെ സൂക്ഷിച്ചതെന്നും പ്രസിഡന്റ് പറഞ്ഞു. തീര്‍ത്തും ഔദ്യോഗികമായി തന്നെ പഞ്ചായത്ത് അധീനതയിലുള്ള സ്ഥലത്താണ് ഇതു സൂക്ഷിച്ചത്. നിരവധി യോഗങ്ങള്‍ ഇവിടെ നടന്നതാണെന്നും അപ്പോഴെല്ലാം ഈ സാധനങ്ങള്‍ ഇവിടെ ഉണ്ടായിരുന്നുവെന്നും അന്നൊന്നും എന്തുകൊണ്ട് ആരോപണങ്ങള്‍ ഉന്നയിച്ചില്ലെന്നും പ്രസിഡന്റ് ചോദിച്ചു.
സംഭവത്തില്‍ പ്രതിഷേധിച്ച് യു.ഡി.എഫ് പ്രവര്‍ത്തകര്‍ കാരശ്ശേരി പഞ്ചായത്ത് ഓഫിസിലേക്ക് മാര്‍ച്ച് നടത്തി. നിരവധി പ്രവര്‍ത്തകര്‍ പങ്കെടുത്ത മാര്‍ച്ച് നോര്‍ത്ത് കാരശ്ശേരി ചുറ്റി പഞ്ചായത്ത് ഓഫിസിനു മുന്നില്‍ സമാപിച്ചു. ബ്ലോക്ക് കോണ്‍ഗ്രസ് പ്രസിഡന്റ് എം.ടി അഷ്‌റഫ് ഉദ്ഘാടനം ചെയ്തു. എം.പി അബ്ദുല്‍ ബര്‍ അധ്യക്ഷനായി.