പേരാമ്പ്ര: ബസ് ജീവനക്കാരും ബൈക്ക് യാത്രികനും തമ്മില്‍ കൈയാങ്കളി. ബസുകള്‍ അപകടകരമാം വിധം മത്സര ഓട്ടം നടത്തിയതിനെ ചോദ്യം ചെയ്തതിന് ബസ് ജീവനക്കാരും സ്ഥലത്തെത്തിയ പൊലിസും തന്നെ മര്‍ദിച്ചെന്ന് ആരോപിച്ച് എരവട്ടൂര്‍ സ്വദേശി പുതിയോട്ടില്‍ മീത്തല്‍ ബാസിത്തി (25)നെ പേരാമ്പ്ര താലൂക്ക് ആശുപത്രിയില്‍ പ്രവേശിപ്പിച്ചു.
ഇന്നലെ വൈകിട്ട് പേരാമ്പ്ര ബസ് സ്റ്റാന്‍ഡിന് സമീപംവച്ചാണ് ബസുകള്‍ ഇയാളുടെ വാഹനത്തിന് ചേര്‍ന്ന് മറികടന്നത്. ബസിനെ പിന്തുടര്‍ന്ന് എത്തിയ സാബിത്ത് ഇത് ചോദ്യം ചെയ്തപ്പോള്‍ ബസ് ജീവനക്കാര്‍ ചേര്‍ന്ന് മര്‍ദിക്കുകയായിരുന്നെന്ന് പറയുന്നു.
സ്ഥലത്തെത്തിയ പൊലിസ് ഇയാളെ കസ്റ്റഡിയില്‍ എടുക്കുകയായിരുന്നു. ഇയാളെ പിന്നീട് കോഴിക്കോട് മെഡിക്കല്‍ കോളജിലേക്ക് മാറ്റി.
എന്നാല്‍ ബസ് ബൈക്കിന് അടുത്തുപോയെന്ന് പറഞ്ഞ് ഒരു സംഘം ആളുകള്‍ തങ്ങളെ ക്രൂരമായി മര്‍ദിക്കുയായിരുന്നെന്ന് ആരോപിച്ച് ശ്രീ ഗോകുലം ബസ് ജീവനക്കാരായ ഡ്രൈവര്‍ മരുതോങ്കര വലിയ വീട്ടുമ്മല്‍ രമേശന്‍, കണ്ടക്ടര്‍ പാലേരി കാപ്പുമലയില്‍ നസീര്‍ എന്നിവരെയും പേരാമ്പ്ര താലൂക്ക് ആശുപത്രിയില്‍ പ്രവേശിപ്പിച്ചു.