കല്‍പ്പറ്റ: ലക്കിടി ഓറിയന്റല്‍ കോളജിലെ വിദ്യാര്‍ഥികള്‍ താമസിക്കുന്ന കല്‍പ്പറ്റ അമ്പിലേരിയിലെ ബോയ്‌സ് ഹോസ്റ്റലിലെ കക്കൂസ് ടാങ്ക് നിറഞ്ഞതുമൂലം ദിവസങ്ങളായി മലിനജലം പുറത്തേക്കൊഴുകി സമീപത്തെ കിണറിലും മറ്റും കലരുന്നതായി വിദ്യാര്‍ഥികള്‍.
ഇതോടെ ഹോസ്റ്റല്‍ അടച്ചുപൂട്ടാന്‍ നഗരസഭ ഉത്തരവിട്ടു. ഹോസ്റ്റലിലെ കക്കൂസ് മാലിന്യം സമീപത്തെ കിണറിലും മറ്റും കലര്‍ന്നതായും ഇതുമൂലം വിദ്യാര്‍ഥികള്‍ക്ക് ആരോഗ്യ പ്രശ്‌നങ്ങളുണ്ടായതായും വിദ്യാര്‍ഥികള്‍ പരാതിപ്പെട്ടിരുന്നു. ഇതേതുടര്‍ന്ന് എസ്.എഫ്.ഐയുടെ നേതൃത്വത്തില്‍ വിദ്യാര്‍ഥികള്‍ സ്‌കൂള്‍ അധികൃതരോട് പരാതിപ്പെട്ടെങ്കിലും പരിഗണിച്ചില്ലെന്നും കുട്ടികള്‍ പറയുന്നു. കൂടാതെ പരസ്യമായി പ്രതികരിക്കുന്നവരെ മാനസികമായി തളര്‍ത്തുന്ന നിലപാടാണ് കോളജ് അധികൃതര്‍ സ്വീകരിക്കുന്നതെന്നും കുട്ടികള്‍ പറയുന്നു. ഉദ്യോഗസ്ഥരുടെ പരിശോധനയില്‍ ഹോസ്റ്റല്‍ ലൈസന്‍സില്ലാതെയാണ് പ്രവര്‍ത്തിച്ച് വരുന്നതെന്ന് കണ്ടെത്തി.