കുന്നംകുളം: വണ്‍വേ തെറ്റിച്ച് എത്തിയ ഓട്ടോയെ തടയാന്‍ശ്രമിച്ച് സ്പഷല്‍ പൊലിസുകാരന്റെ കാലില്‍ ഓട്ടോകയറി. പരുക്കേറ്റ ആല്‍തറ താഴേയില്‍ അജിത്ത് 20നെ താലൂക്ക് ആശുപത്രിയില്‍ പ്രവേശിപ്പിച്ചു. അപകടത്തിന് കാരണമായ ഓട്ടോ ഡ്രൈവറിനെ പൊലിസ് അറസ്റ്റ് ചെയ്തു. കുന്നംകുളം തൃശൂര്‍ റോഡ് വണ്‍വേയിലായിരുന്നു സംഭവം. തൃശൂര്‍ റോഡിലെ ഓട്ടോറിക്ഷ പാര്‍ക്കിലോടുന്ന വാഹനമാണ് അപകടത്തിന് കാരണമായത്.
തൃശൂര്‍ റോഡില്‍ നിന്നും നേരിട്ട് ബസ് സ്റ്റാന്‍ഡ് പരിസരത്തേക്ക് വാഹനങ്ങള്‍ പ്രവേശിക്കാന്‍ അനുമതിയില്ല. ഇത് സംബന്ധിച്ച് കുറച്ച് ദിവസങ്ങളായി തര്‍ക്കവും നിലനിന്നിരുന്നു. തൃശൂര്‍ റോഡില്‍ നിന്നും നേരിട്ട് ബസ്സ്റ്റാന്‍ഡ് ഭാഗത്തേക്ക് വന്നിരുന്ന ഓട്ടോയെ ഡ്യൂട്ടിയിലുണ്ടായിരുന്ന സ്പഷല്‍ പൊലിസ് തടയുകയായിരുന്നു. ഇതിനെ വെട്ടിച്ച് മാറ്റി മുന്‍പോട്ടെടുക്കാന്‍ ശ്രമിക്കുന്നതിനിടെ ടയര്‍ ഇയാളുടെ കാലില്‍ കയറി. പരുക്കേറ്റ രഞ്ജിത്തിനെ ഉടന്‍ ആശുപത്രിയില്‍ പ്രവേശിപ്പിച്ചു. ഡ്രൈവര്‍ക്കെതിരേ ജാമ്യമില്ലാ വകുപ്പിന് കേസെടുത്തതായി പൊലിസ് പറഞ്ഞു.