വടക്കാഞ്ചേരി: മുളങ്കുന്നത്ത് കാവ് മെഡിക്കല്‍ കോളജില്‍ ഇന്ത്യന്‍ കോഫി ഹൗസ് കാന്റീന്‍ അടച്ച് പൂട്ടാനുള്ള ആശുപത്രി അധികൃതരുടെ നീക്കത്തിന് തിരിച്ചടി. പ്രിന്‍സിപ്പല്‍ ഡോ. എം. എ ആന്‍ഡ്രൂസിന്റെ ഉത്തരവ് ഹൈക്കോടതി രണ്ടാഴ്ച്ചത്തേയ്ക്ക് സ്‌റ്റേ ചെയ്തു. പൂട്ടുന്നതിന് സാവകാശം തേടി കോഫി ഹൗസ് സഹകരണ സംഘം സെക്രട്ടറി നല്‍കിയ കത്ത് പ്രിന്‍സിപ്പല്‍ ഡോ.എം. എ ആന്‍ഡ്രൂസ് കഴിഞ്ഞ ദിവസം തള്ളുകയും ഉത്തരവ് കാന്റീന്‍ ചുമരില്‍ പതിപ്പിയ്ക്കുകയും ചെയ്തിരുന്നു. ഇതിനെതിരെയാണ് കോഫീ ഹൗസ് സഹകരണ സംഘം ഹൈക്കോടതിയെ സമീപിച്ചത്.
പ്രവര്‍ത്തനം അവസാനിപ്പിയ്ക്കാന്‍ ഒരു വര്‍ഷത്തെ സാവകാശമാണ് കോഫീ ഹൗസ് ഭരണസമിതി ചോദിച്ചിരുന്നത്. ക്യാന്റീന്‍ നടത്തിപ്പിനായി നിയമിച്ച 130 തൊഴിലാളികളെ പുനര്‍വിന്യസിയ്ക്കുന്നതിനായാണ് സമയം ആവശ്യപ്പെട്ടത്. പുതിയ രണ്ട് ബ്രാഞ്ചുകള്‍ തുറക്കുന്നത് വരെ സാവകാശം വേണമെന്നായിരുന്നു ആവശ്യം. എന്നാല്‍ കാന്റീന്‍ നടത്തിപ്പിന് ഇന്ത്യന്‍ കോഫി ഹൗസ് സൊസൈറ്റി സെക്രട്ടറി പ്രിന്‍സിപ്പാളുമായി ഉണ്ടാക്കിയ കരാറിന്റെ കാലാവധി കഴിഞ്ഞ 30ന് അവസാനിച്ചുവെന്നും നിലവില്‍ സര്‍ക്കാര്‍ നിര്‍ദ്ദേശങ്ങളനുസരിച്ച് ആശുപത്രി അങ്കണത്തില്‍ കാന്റീന്‍ അനുവദിയ്ക്കുന്നതിന് എച്ച്. ഡി.എസ് തീരുമാനവും, അനുവാദവും ആവശ്യമാണ്. ആശുപത്രി അങ്കണത്തില്‍ രോഗികളുടേയും, കൂട്ടിരിപ്പുകാരുടേയും ആവശ്യത്തിനായി അടുത്ത കാലത്തായി എച്ച്.ഡി.എസ് തീരുമാനപ്രകാരം മറ്റൊരു കാന്റീന്‍ പ്രവര്‍ത്തനമാരംഭിച്ചിട്ടുണ്ടെന്നും പ്രിന്‍സിപ്പല്‍ മറുപടി നല്‍കിയിരുന്നു.
ഇതിനെതിരെയാണ് തൊഴിലാളികള്‍ ഹൈക്കോടതിയിലെത്തിയത്.