കൃഷ്ണഗിരി: അണ്ടര്‍ 16 വിജയ് മര്‍ച്ചന്റ് ട്രോഫി മത്സരങ്ങള്‍ക്ക് ശേഷം കൃഷ്ണഗിരി രഞ്ജി ട്രോഫി മത്സരത്തിന് വേദിയാകുന്നു.
കാലാവസ്ഥ പ്രശ്‌നത്തെ തുടര്‍ന്ന് മാറ്റിവച്ച സിക്കിം-പുതുച്ചേരി മത്സരമാണ് കൃഷ്ണഗിരിയില്‍ നടക്കുക. ഈമാസം ആറുമുതല്‍ ഒന്‍പത് വരേയാണ് മത്സരം. വയനാട്ടിലെത്തിയ ഇരുടീമുകളും സ്റ്റേഡിയത്തില്‍ പരിശീലനം നടത്തി. ഐ.പി.എല്‍ താരമായ അഭിഷേക് നായര്‍, മുന്‍ ഇന്ത്യന്‍ താരമായ പങ്കജ് സിങ്, മുന്‍ കേരളാ രഞ്ജി താരമായ ഫാബിദ് ഫാറൂഖ് അഹമ്മദ് എന്നിവര്‍ പുതുച്ചേരി നിരയില്‍ കൃഷ്ണഗിരിയില്‍ കളത്തിലിറങ്ങും. നിലവില്‍ 13 പോയിന്റുള്ള സിക്കിം ഗ്രൂപ്പ് മൂന്നാം സ്ഥാനത്തും പുതുച്ചേരി 11 പോയിന്റുമായി നാലാം സ്ഥാനത്തുമാണ്.