കൊണ്ടോട്ടി: തിരൂരങ്ങാടി റോഡില്‍ നിയന്ത്രണം വിട്ട കാര്‍ താഴ്ചയിലേക്ക് തലകീഴായി മറിഞ്ഞു. കാറിലുണ്ടായിരുന്ന പിഞ്ചുകുഞ്ഞടക്കം യാത്രക്കാര്‍ നിസാരമായ പരുക്കോടെ രക്ഷപ്പെട്ടു.

തറയിട്ടാലിന് സമീപം ചെര്‍ളപ്പാലത്തിനടുത്തുള്ള ചെങ്കുത്തായ ഇറക്കത്തില്‍ ഇന്നലെ അഞ്ചരയോടെയാണ് അപകടം. കാടപ്പടി സ്വദേശികളാണ് കാറിലുണ്ടായിരുന്നത്. ഇവര്‍ കൊണ്ടോട്ടി ഭാഗത്തുനിന്ന് നാട്ടിലേക്ക് പോവുമ്പോഴാണ് അപകടത്തില്‍ പെട്ടത്.കാര്‍ തലകീഴായി മറിഞ്ഞെങ്കിലും യാത്രക്കാര്‍ക്ക് കാര്യമായ പരുക്കുകളൊന്നും പറ്റിയില്ല. അപകട വിവരമറിഞ്ഞ് നിരവധി പേര്‍ പ്രദേശത്ത് തടിച്ചുകൂടി.
സ്ഥിരം അപകടമേഖലയായ പ്രദേശത്ത് സുരക്ഷാ സംവിധാനങ്ങളൊരുക്കാന്‍ കഴിഞ്ഞ മാസം എം.എല്‍.എ.യുടെ നേതൃത്വത്തില്‍ ഉദ്യോഗസ്ഥരെത്തിയിരുന്നു. റോഡരികില്‍ ഇരുമ്പുവേലി സ്ഥാപിക്കാന്‍ തീരുമാനിച്ചിട്ടുണ്ടെങ്കിലും തുടര്‍നടപടികളായിട്ടില്ല.