മാനന്തവാടി: പ്രളയം കഴിഞ്ഞ് നൂറു ദിവസം പിന്നിട്ടിട്ടും നാശനഷ്ടങ്ങളുടെ നഷ്ടപരിഹാര വിതരണമോ കണക്കെടുപ്പോ നടന്നില്ല. കിണറുകള്‍ തകര്‍ന്നതും മണ്ണിടിഞ്ഞതുമുള്‍പ്പെടെ നിരവധി അപേക്ഷകള്‍ പരിശോധന പോലും നടത്താതെ പഞ്ചായത് ഓഫിസുകളില്‍ കെട്ടിക്കിടക്കുകയാണ്.
വീടുകളുടെ നാശനഷ്ടങ്ങള്‍ മാത്രം വിലയിരുത്തിയാല്‍ മതിയെന്ന നിര്‍ദേശത്തെ തുടര്‍ന്നാണ് അപേക്ഷകള്‍ പരിഗണിക്കാതെ മാറ്റി വെച്ചത്. സംസ്ഥാനത്തെ പിടിച്ചു കുലുക്കിയ പ്രളയത്തില്‍ ജില്ലയിലെ നൂറുകണക്കിന് കിണറുകളാണ് ഇടിഞ്ഞു താഴ്ന്നത്. പൊതുകിണറുകളും സ്വകാര്യ വ്യക്തികളുടെതുമുള്‍പ്പെടെ കിണറുകള്‍ തകര്‍ന്നതോടെ നഷ്ടപരിഹാരം ലഭിക്കുമെന്ന പ്രതീക്ഷയില്‍ വീടുകള്‍ക്ക് ഭീഷണിയായിട്ട് പോലും കിണര്‍ നികത്താന്‍ കാത്ത് നില്‍ക്കാതെ വില്ലേജ് ഓഫിസുകളിലേക്കാണ് പലരും അപേക്ഷയുമായി ഓടിച്ചെന്നത്. അപേക്ഷകള്‍ സ്വീകരിച്ച് പരിശോധനക്കായി പഞ്ചായത്ത് ടെക്‌നിക്കല്‍ വിഭാഗം ഉദ്യോഗസ്ഥര്‍ക്കായി കൈമാറിയെങ്കിലും വീടുകളുടെ മാത്രം നഷ്ടം കണക്കെടുപ്പ് നടത്താനായിരുന്നു സര്‍ക്കാര്‍ നിര്‍ദേശം. ഇതോടെ മറ്റുള്ള അപേക്ഷകളെല്ലാം മാറ്റി വെക്കപ്പെട്ടു.
1898 ലക്ഷം രൂപയുടെ നാശനഷ്ടമാണ് ജലസേചനം ഉള്‍പ്പെടെയുള്ള ജലവിഭവ സംവിധാനങ്ങള്‍ക്ക് സംഭവിച്ച നഷ്ടമായി ലോകബാങ്കിന് ജില്ലാ ഭരണ കൂടം സമര്‍പ്പിച്ച കണക്ക്. എന്നാല്‍ ഈ കണക്കുകള്‍ പോലും കൃത്യമായ പരിശോധന നടത്തിയ ശേഷം ഉണ്ടാക്കിയതല്ലെന്നാണ് പറയപ്പെടുന്നത്. കിണര്‍ മണ്ണിട്ട് മൂടേണ്ടി വന്നവരുടെ വീടുകളൊന്നും ആരു തന്നെ പരിശോധിച്ചിട്ടില്ല. വീടിന് ഭീഷണിയാകും വിധം മണ്ണിടിഞ്ഞ് വീണതും ജീവിതോപാധികള്‍ നഷ്ടപ്പെട്ടതുമുള്‍പ്പെടെയുള്ള നാശനഷ്ടങ്ങളുടെയും കണക്കെടുപ്പുകളും നഷ്ടപരിഹാര വിതരണവും ഇത് വരെയും നടത്തിയിട്ടില്ല. ഇതോടെ വില്ലേജുകളില്‍ അപേക്ഷകള്‍ നല്‍കി സര്‍ക്കാര്‍ നഷ്ടപരിഹാരം കാത്തിരിക്കുന്നവരുടെ കാത്തിരിപ്പ് വൃഥാവിലാവും.