ചേലക്കര: വിനോദയാത്ര ഭീകര ഓര്‍മ്മയായതിന്റെ ആശങ്കയും വേദനയും വിട്ടൊഴിയാതെ പഴയന്നൂര്‍ ഗവ. ഹയര്‍ സെക്കന്ററി സ്‌കൂള്‍ വിദ്യാര്‍ഥികളും അധ്യാപകരും. ദുരന്തം തലനാരിഴയ്ക്കു വഴിമാറിയതിന്റെ ആശ്വാസവും ആഹ്ലാദവും മറച്ചു വെയ്ക്കുന്നില്ല കുട്ടികള്‍.
നടന്നതെല്ലാം മറക്കാന്‍ ശ്രമിയ്ക്കുകയാണവര്‍. അതീവ സന്തോഷത്തിലായിരുന്നു 44 അംഗ സംഘം. 40 വിദ്യാര്‍ഥികളും നാല് അധ്യാപകരും ഉള്‍പ്പെടെയുള്ള സംഘം തിങ്കളാഴ്ച്ചയാണ് പഴയന്നൂരില്‍ നിന്നു യാത്ര തിരിച്ചത്.
മൂന്നാര്‍ സന്ദര്‍ശിച്ചു മടങ്ങുന്നതിനിടയിലാണ് ദുരന്തമുണ്ടായത്. വിദ്യാര്‍ഥിനികള്‍ സഞ്ചരിച്ചിരുന്ന ബസ് കൊച്ചി ധനുഷ് കോടി ദേശീയപാതയില്‍ അടിമാലിയില്‍ നിന്നു മൂന്നാര്‍ ഭാഗത്തേയ്ക്കു പോയിരുന്ന ജീപ്പിനു സൈഡ് കൊടുക്കുന്നതിനിടെ അപകടം സംഭവിക്കുകയായിരുന്നു. 30 അടി താഴ്ചയിലേക്കു മറിഞ്ഞ ബസ് രണ്ടു തവണ കരണം മറിഞ്ഞ് മരങ്ങള്‍ക്കിടയില്‍ തങ്ങി നിന്നതിനാലാണ് വന്‍ ദുരന്തം ഒഴിവായതെന്നു പഴയന്നൂരില്‍ തിരിച്ചെത്തിയ യാത്രാ സംഘം പറഞ്ഞു. അപകടം നടന്ന ഉടന്‍ നാട്ടുകാരും അഗ്‌നിശമന സേനയും പൊലിസും ചേര്‍ന്നു നടത്തിയ രക്ഷാപ്രവര്‍ത്തനവും ദുരന്തം ഇല്ലാതാക്കി. അപകടത്തില്‍ പെട്ട ബസിനു പുറകില്‍ സഞ്ചരിച്ചിരുന്ന ബസിലെ സ്‌കൂളിലെ ആണ്‍കുട്ടികളും സജീവമായി രക്ഷാപ്രവര്‍ത്തനത്തിനു നേതൃത്വം നല്‍കി.
വാര്‍ത്ത റിപ്പോര്‍ട്ട് ചെയ്ത ഉടന്‍ സ്ഥലത്ത് കുതിച്ചെത്തിയ രക്ഷിതാക്കളും പി.ടി.എ ഭാരവാഹികളും ചേര്‍ന്നു മറ്റൊരു ബസിലാണ് കുട്ടികളെ ഇന്നലെ കാലത്ത് പഴയന്നൂരിലെത്തിച്ചത്. കണ്ണിനു പരുക്കേറ്റ അധ്യാപിക അവധിയെടുത്ത് ജന്മനാടായ തിരുവനന്തപുരത്തേയ്ക്കു തിരിച്ചു.