കോട്ടയം: കാഞ്ഞിരപ്പള്ളിയില്‍ എട്ടാം ക്ലാസ് വിദ്യാര്‍ഥിനിയെ വീട്ടില്‍ അതിക്രമിച്ച് കയറി പീഡിപ്പിച്ച കേസിലെ പ്രതി അറസ്റ്റില്‍. കാഞ്ഞിരപ്പള്ളി കരിമ്പ് കയം സ്വദേശി അരുണ്‍ സുരേഷാണ് പിടിയിലായത്. ഇന്നലെ വൈകീട്ടോടെ സ്‌കൂള്‍വിട്ട് വീട്ടിലെത്തിയതായിരുന്നു വിദ്യാര്‍ഥിനി. ഈ സമയത്ത് കുട്ടിയുടെ വീട്ടിലെത്തിയ പ്രതി കുടിക്കാന്‍ വെള്ളം ആവശ്യപ്പെടുകയായിരുന്നു. വളരെ ആസൂത്രിതമായിട്ടായിരുന്നു പ്രതിയുടെ നീക്കങ്ങള്‍. വീട്ടില്‍ മറ്റാരുമില്ലെന്ന് മനസിലാക്കിയായിരുന്നു ഇയാള്‍ കടന്നുവന്നത്.

പെണ്‍കുട്ടിയെ അതിക്രമിച്ച് കയറി പീഡിപ്പിച്ച ശേഷം ഇയാള്‍ ഇവിടെ നിന്നും രക്ഷപ്പെടുകയായിരുന്നു. ഉടന്‍തന്നെ പെണ്‍കുട്ടി വീട്ടുകാരെ ഫോണില്‍ വിളിച്ച് വിവരം പറഞ്ഞു. തുടര്‍ന്ന് വീട്ടുകാരെത്തിയാണ് പൊലിസില്‍ പരാതി നല്‍കിയത്. വിദ്യാര്‍ഥിനിയുടെ വാക്കുകളില്‍ നിന്നും പ്രതി ആ നാട്ടുകാരനല്ലെന്നാണ് മനസ്സിലായതെന്ന് പൊലിസ് പറഞ്ഞു.

പെണ്‍കുട്ടി നല്‍കിയ വിവരങ്ങളുടെ അടിസ്ഥാനത്തില്‍ പൊലിസ് ഒരു രേഖാചിത്രം തയാറാക്കിയിരുന്നു. ഇന്നലെ രാത്രിയാണ് ഇയാള്‍ പൊലിസ് പിടിയിലായത്. ബലാത്സംഗം, കുട്ടികള്‍ക്കെതിരായ ലൈംഗിക അതിക്രമം(പോക്സോ) തുടങ്ങിയ വകുപ്പുകള്‍ ചേര്‍ത്താണ് പൊലിസ് കേസെടുത്തിരിക്കുന്നത്.