ദമസ്‌കസ്: കിഴക്കന്‍ സിറിയയില്‍ യു.എസ് നേതൃത്വത്തില്‍ നടന്ന വ്യോമാക്രമണത്തില്‍ 60 സാധാരണക്കാര്‍ കൊല്ലപ്പെട്ടു. കിഴക്കന്‍ പ്രവിശ്യയായ ദേര്‍ അസ്സൂറിലാണ് ആക്രമണം നടന്നതെന്ന് ഔദ്യോഗിക വാര്‍ത്താ ഏജന്‍സിയായ സനാ റിപ്പോര്‍ട്ട് ചെയ്തു.
ഗ്രാമങ്ങള്‍ക്ക് നേരെയാണ് ആക്രമണം നടന്നത്. ഇന്നലെയായിരുന്നു ആക്രമണം. കൊല്ലപ്പെട്ടവരില്‍ ഏറെയും സ്ത്രീകളും കുട്ടികളുമാണ്. നൂറുകണക്കിനാളുകള്‍ക്ക് പരുക്കേറ്റു. ദേര്‍ അസ്സൂറിലെ ബുകാമല്‍ നഗരത്തില്‍ ആശുപത്രിക്കും ക്ലബിനും നേരെയാണ് ആക്രമണം നടന്നതെന്നാണ് റിപ്പോര്‍ട്ട്. 2014 മുതല്‍ വടക്കന്‍ സിറിയയിലെ ഐ.എസ് കേന്ദ്രങ്ങള്‍ക്കു നേരെ യു.എസ് വ്യോമാക്രമണം നടത്തുന്നുണ്ട്. സിറിയന്‍ സര്‍ക്കാരിന്റെ അനുമതിയില്ലാതെയാണ് യു.എസ് ആക്രമണം നടത്തുന്നതെന്ന് നേരത്തെ സിറിയ ഐക്യരാഷ്ട്രസഭയെ അറിയിച്ചിരുന്നു.