ജറൂസലേം: സിറിയയില്‍ ഇറാന്റെ സാന്നിധ്യം തുടരുന്നപക്ഷം സിറിയ ഇറാന്റെ വിയറ്റ്‌നാമാവുമെന്ന് ഇസ്‌റാഈല്‍ പ്രതിരോധമന്ത്രി നാഫ്തലി ബെനറ്റ്. ഇസ്‌റാഈലിനു ചുറ്റും അഗ്നിവളയം തീര്‍ക്കാനാണ് ഇറാന്‍ ശ്രമിക്കുന്നത്. ലബ്‌നാനില്‍ ഇതിനകം സാന്നിധ്യമുറപ്പിച്ച ഇറാന്‍ സിറിയയിലും ഗസ്സയിലും സാന്നിധ്യം സ്ഥാപിക്കാനാണ് ശ്രമിക്കുന്നത്. അതിനാല്‍ ഇറാനോട് ഞങ്ങള്‍ പറയുന്നു, സിറിയ നിങ്ങളുടെ വിയറ്റ്‌നാമാവും- അദ്ദേഹം പറഞ്ഞു.
ആണവായുധ ശേഷി കൈവരിച്ചേക്കാമെന്നതിനാല്‍ ഇറാനെതിരേ സൈനിക നടപടി ഇസ്‌റാഈലിന്റെ പരിഗണനയിലാണെന്ന് കഴിഞ്ഞ ദിവസം വിദേശകാര്യമന്ത്രി യിസ്‌റാഈല്‍ കാറ്റ്‌സ് മുന്നറിയിപ്പു നല്‍കിയിരുന്നു.
ഇറാനില്‍ ബോംബിടുന്ന കാര്യം ഇസ്‌റാഈലിന്റെ പരിഗണനയിലുണ്ടോ എന്ന മാധ്യമപ്രവര്‍ത്തകരുടെ ചോദ്യത്തിനു മറുപടിയായാണ് മന്ത്രി ഇങ്ങനെ പറഞ്ഞത്. ആണവായുധമുണ്ടാക്കാന്‍ ഇറാനെ ഒരുനിലയ്ക്കും ഞങ്ങള്‍ അനുവദിക്കില്ല. അതില്ലാതാക്കാന്‍ അവസാന പോംവഴി അതാണെങ്കില്‍ സൈനികമായി പ്രതികരിക്കും- കാറ്റ്‌സ് പറഞ്ഞു.
നവംബറില്‍ സിറിയയിലെ നിരവധി ഇറാന്‍ കേന്ദ്രങ്ങളില്‍ ഇസ്‌റാഈല്‍ ആക്രമണം നടത്തിയിരുന്നു. ഗോലാന്‍കുന്നുകളില്‍ നിന്നു വരുന്ന റോക്കറ്റുകള്‍ സിറിയയിലെ ഇറാന്‍ സേന വിടുന്നതാണെന്ന് തിരിച്ചറിഞ്ഞതിനെ തുടര്‍ന്നായിരുന്നു ഇത്.