ബംഗളൂരു: കര്‍ണാടയിലെ 15 നിയമസഭാ മണ്ഡലങ്ങളിലേയ്ക്കുള്ള നിര്‍ണായക ഉപതെരഞ്ഞെടുപ്പിന്റെ വോട്ടെണ്ണല്‍ ആരംഭിച്ചു. ആദ്യ ഫലസൂചനകളില്‍ ബി.ജെ.പിക്കാണ് മുന്നേറ്റം.

11 കേന്ദ്രങ്ങളിലാണ് വോട്ടെണ്ണല്‍. ചുരുങ്ങിയത് ആറു സീറ്റുകളെങ്കിലും നേടിയാലെ ബി.ജെ.പി സര്‍ക്കാറിന് മുന്നോട്ടു പോകാന്‍ സാധിക്കൂ. ബി.ജെ.പി 13 സീറ്റുകളില്‍ വിജയിക്കുമെന്നാണ് മുഖ്യമന്ത്രി യെദിയൂരപ്പയുടെ അവകാശവാദം.

എന്നാല്‍ അട്ടിമറി നടക്കുമെന്ന സൂചനകളാണ് കോണ്‍ഗ്രസ് നല്‍കുന്നത്. ഭരണ സഖ്യം പിരിഞ്ഞതിന് ശേഷം ബി.ജെ.പിയ്ക്ക് അനുകൂലമായി നിന്നിരുന്ന ജെ.ഡി.എസ്, നിലപാടില്‍ വരുത്തിയ മാറ്റമാണ് കോണ്‍ഗ്രസിന് വലിയ പ്രതീക്ഷ നല്‍കുന്നത്. ഇരു പാര്‍ട്ടികളും ഒറ്റയ്ക്കാണ് മത്സരിക്കുന്നത് എങ്കിലും ചുരുങ്ങിയത് 12 സീറ്റുകളിലെങ്കിലും വിജയം പ്രതീക്ഷിയ്ക്കുന്നുണ്ട്. ബി.ജെ.പി പക്ഷത്തേക്ക് കൂറുമാറിയ 13 പേര്‍ മത്സരത്തിനിറങ്ങിയത് ജനങ്ങള്‍ക്കിടയിലും വലിയ പ്രതിഷേധം ഉണ്ടാക്കായിട്ടുണ്ട്. വോട്ടെടുപ്പ് ദിനത്തില്‍ ഇത് പ്രതിഷേധത്തിന്റെ രൂപത്തില്‍ പ്രകടമായിരുന്നു.