കോഴിക്കോട്: പുതിയ ടെക്‌നോളജികളിലൂടെ വ്യവസായത്തിലും വാണിജ്യത്തിലും ചെറുകിട വ്യാപാരത്തിലും പുരോഗതി കൊണ്ടുവരിക എന്ന ലക്ഷ്യത്തോടെ സംഘടിപ്പിക്കുന്ന 'റിബൂട്ട് 2018' ബിസിനസ് എക്‌സ്‌പോ കോഴിക്കോട് സൈബര്‍ പാര്‍ക്കില്‍ നടക്കും. കാലിക്കറ്റ് ഫോറം ഫോര്‍ ഐ.ടിയുടെ വാര്‍ഷിക പരിപാടിയാണിത്. 15, 16 തിയതികളിലായി സൈബര്‍ പാര്‍ക്കിലെ സഹ്യ ബില്‍ഡിങ്ങില്‍ രാവിലെ ഒന്‍പതിനു പരിപാടി ആരംഭിക്കും. പരിപാടിയില്‍ 5000 പേര്‍ പങ്കെടുക്കുമെന്നാണ് പ്രതീക്ഷിക്കുന്നതെന്ന് സംഘാടകര്‍ അറിയിച്ചു.  ഐ.ടി മേഖലകളിലെ സാധ്യതകളെ അറിയാനും അറിയിക്കാനുമുള്ള അവസരം ഇവിടെ ഉണ്ടാകും. കോഴിക്കോടിനെ ഏറ്റവും പുതിയ ട്രെന്റുകളിലൂടെ വികസിപ്പിക്കാനുള്ള സാധ്യതകള്‍ ആരായുന്ന പരിപാടിയുടെ രണ്ടാം ദിനത്തില്‍ ജോബ് ഫെസ്റ്റും സംഘടിപ്പിച്ചിട്ടുണ്ട്. 50 കമ്പനികള്‍ പങ്കെടുക്കും. ഐ.ടി പ്രൊഫഷനലുകള്‍ക്കു വേണ്ടിയല്ല പരിപാടിയെന്നും സാങ്കേതിക പരിജ്ഞാനം ആവശ്യമുള്ള സാധാരണക്കാര്‍ക്കു വേണ്ടിയാണെന്നും കാലിക്കറ്റ് ഫോറം ഫോര്‍ ഐ.ടിയുടെ പ്രസിഡന്റ് ഹാരിസ് പി.ടി, സെക്രട്ടറി കെ.വി അബ്ദുല്‍ ഗഫൂര്‍, വൈസ് പ്രസിഡന്റ് എ.സി ദീപക്, ഐ.ടി പ്രൊഫഷനലും എഴുത്തുകാരനുമായ ശ്രീനിവാസ് ഹൈദരാബാദ് വാര്‍ത്താ സമ്മേളനത്തില്‍ പങ്കെടുത്തു.