തിരൂര്‍: മുസ്‌ലിം യൂത്ത്‌ലീഗ് യുവജനയാത്രക്ക് തിരൂരിന്റെ തീരദേശ മണ്ണില്‍ സ്‌നേഹോഷ്മള വരവേല്‍പ്. സൗഹാര്‍ദത്തിന്റെ സന്ദേശം പകര്‍ന്ന് പാണക്കാട് മുനവ്വറലി ശിഹാബ് തങ്ങളുടെ നേതൃത്വത്തില്‍ പ്രയാണം തുടരുന്ന യുവജനയാത്രയെ തുഞ്ചന്റെ മണ്ണ് ഇരുകൈയും നീട്ടിയാണ് നെഞ്ചേറ്റിയത്.
വര്‍ഗീയമുക്ത ഭാരതം, അക്രമരഹിത കേരളം എന്ന പ്രമേയത്തില്‍ നടത്തുന്ന യുവജനയാത്ര തിരൂരില്‍ ശക്തമായ അലയൊലികളാണുണ്ടാക്കിയത്. ഇന്നലെ ആലത്തിയൂരില്‍ നിന്നാരംഭിച്ച യാത്ര വൈകീട്ട് വൈറ്റ് ഗാര്‍ഡ് പരേഡോട് കൂടി നഗരഹൃദയത്തില്‍ സമാപിച്ചു. ജില്ലയിലെ എട്ട് നിയോജക മണ്ഡലങ്ങളില്‍ നിന്നുള്ള വൈറ്റ് ഗാര്‍ഡ് അംഗങ്ങള്‍ പരേഡില്‍ അണിനിരന്നു.
ആലത്തിയൂരില്‍നിന്ന് ആരംഭിച്ച യാത്രയില്‍ ആയിരങ്ങള്‍ കണ്ണികളായി. വഴിയിലുടനീളം സ്ത്രീകളും കുട്ടികളുമുള്‍പ്പെടെ വന്‍ ജനാവലി ജാഥക്ക് അഭിവാദ്യമര്‍പ്പിക്കാനെത്തി. എസ്.എസ്.എം പോളിടെക്‌നിക്ക് പരിസരത്ത്‌നിന്നു ആരംഭിച്ച വൈറ്റ് ഗാര്‍ഡ് പരേഡിലേക്ക് ജാഥ എത്തിച്ചേരുകയായിരുന്നു. പിന്നീട് വൈറ്റ് ഗാര്‍ഡ് വളണ്ടിയര്‍മാരും ജാഥ അംഗങ്ങളും ചിട്ടയോടെ നഗരത്തിലേക്ക് നീങ്ങിയപ്പോള്‍ നഗരം ശുഭ്രനിറമായി മാറി.
സ്വീകരണ സമ്മേളനം മുസ്‌ലിംലീഗ് ദേശീയ ഓര്‍ഗനൈസിങ് സെക്രട്ടറി ഇ.ടി മുഹമ്മദ് ബഷീര്‍ എം.പി ഉദ്ഘാടനം ചെയ്തു. മുസ്‌ലിംലീഗ് ജില്ലാ ജനറല്‍ സെക്രട്ടറി അഡ്വ. യു.എ ലത്വീഫ് അധ്യക്ഷനായി. ജാഥാ നായകരായ സയ്യിദ് മുനവ്വറലി ശിഹാബ് തങ്ങള്‍, പി.കെ ഫിറോസ്, എം.എ സമദ്, നജീബ് കാന്തപുരം പ്രവര്‍ത്തകരെ അഭിവാദ്യം ചെയ്തു. എ.ഐ.സി.സി ജനറല്‍ സെക്രട്ടറി കെ.സി വേണുഗോപാല്‍ എം.പി, മുസ്‌ലിംലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ്, മുതിര്‍ന്ന കോണ്‍ഗ്രസ് നേതാവ് ആര്യാടന്‍ മുഹമ്മദ്, എ.ഐ.സി.സി സെക്രട്ടറി പി.സി വിഷ്ണുനാഥ്, രാജ്‌മോഹന്‍ ഉണ്ണിത്താന്‍, എന്‍.കെ പ്രേമചന്ദ്രന്‍ എം.പി , ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍, ടി.പി അഷ്‌റഫലി, അന്‍വര്‍ മുള്ളമ്പാറ, കെ.ടി അഷ്‌റഫ് സംസാരിച്ചു. ആലത്തിയൂരില്‍ അഡ്വ. യു.എ ലത്വീഫ് ഉദ്ഘാടനം ചെയ്തു. തവനൂര്‍ നിയോജക മണ്ഡലം പ്രസിഡന്റ് ഇബ്രാഹീം മുതൂര്‍ അധ്യക്ഷനായി. സംസ്ഥാന ഭാരവാഹികളായ സി.പി ബാവ ഹാജി, അബ്ദുറഹ്മാന്‍ രണ്ടത്താണി, ടി.എ സലീം സംസാരിച്ചു. ഇന്നും നാളയും യുവജനയാത്ര ജില്ലയില്‍ പര്യടനം തുടരും.
ഇന്ന് കൊളപ്പുറത്ത്‌നിന്ന് രാവിലെ 8.30ന് പര്യടനം പുനഃരാരംഭിക്കും. പാണക്കാട് സയ്യിദ് ബഷീറലി ശിഹാബ് തങ്ങള്‍ ഉദ്ഘാടനം ചെയ്യും. പത്തിന് തലപ്പാറ, 12ന് ചെമ്മാട് എന്നിവിടങ്ങളിലാണ് സ്വീകരണം. വൈകീട്ട് ഏഴിന് താനൂരില്‍ സമാപിക്കും.