ദോഹ: ഖത്തറില്‍ അരങ്ങേറിയ ഗള്‍ഫ് കപ്പില്‍ ബഹ്‌റൈന്‍ ചാംപ്യന്‍മാരായി. കഴിഞ്ഞ ദിവസം നടന്ന ഫൈനലില്‍ എതിരില്ലാത്ത ഒരു ഗോളിന് സഊദി അറേബ്യയെ തകര്‍ത്താണ് ബഹ്‌റൈന്‍ ചരിത്രത്തിലാദ്യമായി കിരീടം സ്വന്തമാക്കിയത്.
69-ാം മിനുട്ടില്‍ മുഹമ്മദ് അല്‍ റുമൈഹിയായിരുന്നു ബഹ്‌റൈന്റെ വിജയ ഗോള്‍ നേടിയത്. കിരീട പ്രതീക്ഷയുണ്ടായിരുന്ന ഖത്തറിനെ സെമിയില്‍ പരാജയപ്പെടുത്തിയായിരുന്നു സഊദിയുടെ ഫൈനല്‍ പ്രവേശം. മറ്റൊരു സെമിയില്‍ ഇറാഖിനെ പെനാല്‍റ്റിയില്‍ കീഴടക്കിയായിരുന്നു ബഹ്‌റൈന്റെ ഫൈനലിലേക്കുള്ള കുതിപ്പ്. മുമ്പ് നാലു തവണ ബഹ്‌റൈന്‍ ഗള്‍ഫ് കപ്പിന്റെ ഫൈനലില്‍ പ്രവേശിച്ചിട്ടുണ്ടെങ്കിലും കിരീടം സ്വന്തമാക്കാന്‍ സാധിച്ചിരുന്നില്ല. 2003-04ലാണ് ബഹ്‌റൈന്‍ അവസാനമായി ഫൈനലിലെത്തിയത്. അന്ന് തങ്ങളെ പരാജയപ്പെടുത്തിയ സഊദി അറേബ്യയ്‌ക്കെതിരായ മധുരപ്രതികാരം കൂടിയായി ഇത്തവണത്തെ ബഹ്‌റൈന്റെ കിരീടനേട്ടം.
കളിയുടെ ആരംഭത്തില്‍ സഊദിക്ക് അനുകൂലമായി പെനാല്‍റ്റി ലഭിച്ചെങ്കിലും അവസരം നഷ്ടപ്പെടുത്തുകയായിരുന്നു. ഇത് ബഹ്‌റൈന് പുതുജീവന്‍ സമ്മാനിച്ചു. ബഹ്‌റൈന്‍ തെരുവുകളിലെല്ലാം ആഹ്ലാദ പ്രകടനങ്ങള്‍ നടന്നു.