മക്ക: വിദേശ രാജ്യങ്ങളില്‍ നിന്നുള്ള ഉംറ തീര്‍ഥാടകരുടെ എണ്ണം വര്‍ധിപ്പിക്കുന്നതിനുള്ള ശ്രമങ്ങളുടെ ഭാഗമായി പ്രാരംഭ, പശ്ചാത്തല സൗകര്യം വര്‍ധിപ്പിക്കുന്നതിന് സിംഗപ്പൂര്‍ ആസ്ഥാനമായി പ്രവര്‍ത്തിക്കുന്ന കമ്പനിയുമായി ധാരണാപത്രം ഒപ്പുവച്ചു. സഊദി ഹജ്ജ്-ഉംറ മന്ത്രാലയമാണ് കരാറില്‍ ഒപ്പുവച്ചത്. ഓണ്‍ലൈന്‍ ഹോട്ടല്‍, യാത്രാ ബുക്കിംഗ് മേഖലയില്‍ സിംഗപ്പൂര്‍ ആസ്ഥാനമായി പ്രവര്‍ത്തിക്കുന്ന അഗോഡ കമ്പനിയുടെ സാങ്കേതികവിദ്യകളും പരിചയ സമ്പത്തും വിഭവങ്ങളും തീര്‍ഥാടകരുടെ സേവനത്തിന് പ്രയോജനപ്പെടുത്തുന്നതിനാണ് ധാരണാപത്രത്തിലൂടെ ലക്ഷ്യമിടുന്നത്.

ലോകത്തെങ്ങുമുള്ള ഹജ്ജ്-ഉംറ തീര്‍ഥാടകര്‍ക്ക് അഗോഡ പ്ലാറ്റ്‌ഫോം വഴി മക്കയിലും മദീനയിലും ഹോട്ടല്‍ ബുക്കിംഗ് നടത്തുന്നതിന് അവസരമൊരുക്കുന്നതിന് ധാരണാപത്രം ലക്ഷ്യമിടുന്നു. ഹജ്ജ് - ഉംറ മന്ത്രാലയത്തിന്റെ അംഗീകാരമുള്ള ഹോട്ടലുകളില്‍ തങ്ങള്‍ക്ക് അനുയോജ്യമായ മുറികള്‍ എളുപ്പത്തില്‍ ബുക്ക് ചെയ്യുന്നതിന് തീര്‍ഥാടകര്‍ക്ക് സാധിക്കും. വ്യത്യസ്ത നിരക്കുകളിലുള്ള ഹോട്ടല്‍ മുറികള്‍ ബുക്ക് ചെയ്യുന്നതിനും ബുക്കിംഗ് നടപടികള്‍ക്ക് വ്യത്യസ്ത ഭാഷകള്‍ പ്രയോജനപ്പെടുത്തുന്നതിനും ഹോട്ടല്‍ വാടക വിദേശ കറന്‍സികളില്‍ അടയ്ക്കുന്നതിനും അഗോഡ വെബ്‌സൈറ്റ് തീര്‍ഥാടകരെ സഹായിക്കും.

ജിദ്ദയിലെ ഹജ്ജ് - ഉംറ മന്ത്രിയുടെ ഓഫിസില്‍ നടന്ന ചടങ്ങില്‍ ഹജ്ജ് - ഉംറ മന്ത്രി ഡോ. മുഹമ്മദ് സ്വാലിഹ് ബിന്‍തനും അഗോഡ കമ്പനി വൈസ് പ്രസിഡന്റ് ഡാമിന്‍ വെര്‍ഷുമാണ് ധാരണാപത്രത്തില്‍ ഒപ്പുവെച്ചത്. ഡെപ്യൂട്ടി ഹജ്, ഉംറ മന്ത്രി ഡോ. അബ്ദുല്‍ഫത്താഹ് മുശാത്തും സന്നിഹിതനായിരുന്നു. ഹജ്, ഉംറ തീര്‍ഥാടകരുടെ എണ്ണത്തിലുണ്ടാകുന്ന വര്‍ധനവിന് അനുസൃതമായി മികച്ച സേവനങ്ങള്‍ നല്‍കുന്നതിനാണ് ശ്രമമെന്നും പുണ്യസ്ഥലങ്ങളിലെ താമസവുമായി ബന്ധപ്പെട്ട് തീര്‍ഥാടകരുടെ ആവശ്യങ്ങള്‍ കൂടുതല്‍ ആഴത്തില്‍ മനസ്സിലാക്കുന്നതിന് ധാരണാപത്രം സഹായിക്കുമെന്നും കരാര്‍ ഒപ്പുവെച്ച ശേഷം മന്ത്രി പറഞ്ഞു.

പ്രതിവര്‍ഷം വിദേശത്തു നിന്ന് എത്തുന്ന ഉംറ തീര്‍ഥാടകരുടെ എണ്ണം 2030 ഓടെ മൂന്നു കോടിയായി ഉയര്‍ത്തുന്നതിന് വിഷന്‍ 2030 പദ്ധതി ലക്ഷ്യമിടുന്നുണ്ട്. ഇതിന്റെ ഭാഗമായി സഊദി എംബസികളെയും കോണ്‍സുലേറ്റുകളെയും സമീപിക്കാതെ വ്യക്തികള്‍ക്ക് നേരിട്ട് ഓണ്‍ലൈന്‍ വഴി ഉംറ വിസകള്‍ അനുവദിക്കുന്നതിനും ഹജ്, ഉംറ മന്ത്രാലയം അടുത്തിടെ തീരുമാനിച്ചിട്ടുണ്ട്.