വടക്കാഞ്ചേരി : വര്‍ത്തമാനകാലഘട്ടത്തില്‍ വിദ്യാഭ്യാസം നേടുക എന്നത് ഏറെ അനിവാര്യതയാണെന്ന് ഇന്ത്യന്‍ ഫുട്‌ബോള്‍ ടീം മുന്‍ ക്യാപ്റ്റന്‍ ഐ.എം വിജയന്‍ പറഞ്ഞു. വിദ്യാഭ്യാസ മുന്നേറ്റത്തോടൊപ്പം വിദ്യാര്‍ഥികള്‍ കായിക മേഖലയിലും ശ്രദ്ധ ചെലുത്തണം. ഇതിന് രക്ഷിതാക്കളുടെ ജാഗ്രതാ പൂര്‍ണ്ണമായ പ്രവര്‍ത്തനം അനിവാര്യമാണെന്നും വിജയന്‍ കൂട്ടി ചേര്‍ത്തു. 

സ്റ്റുഡന്റ് പൊലിസ് കേഡറ്റ് പദ്ധതിയുടെ എട്ടാം വാര്‍ഷികത്തോടനുബന്ധിച്ച് തൃശൂര്‍ റൂറല്‍ എസ്.പി.സി ദിനാചരണവും ഏഴാമത് വാര്‍ഷികാഘോഷവും ഉദ്ഘാടനം ചെയ്തു സംസാരിയ്ക്കുകയായിരുന്നു അദ്ദേഹം. വടക്കാഞ്ചേരി കേരളവര്‍മ്മ പൊതുവായനശാലാ ഹാളില്‍ നടന്ന ആഘോഷ പരിപാടിയില്‍ നഗരസഭ സ്ഥിരം സമിതി അധ്യക്ഷന്‍ എം.ആര്‍ സോമനാരായണന്‍ അധ്യക്ഷനായി.
തെക്കുംകര പഞ്ചായത്ത് മെമ്പര്‍ ബീന ജോണ്‍സണ്‍, കേരളവര്‍മ്മ വായനശാലാ പ്രസിഡണ്ട് വി. മുരളി, പ്രസ് ക്ലബ്ബ് പ്രസിഡണ്ട് ശശികുമാര്‍ കൊടയ്ക്കടത്ത്, ജയന്‍ കുണ്ടുകാട്, എം.ആര്‍ സജയന്‍ , തൃശൂര്‍ ജില്ലാ നോഡല്‍ ഓഫീസര്‍ എസ്. അമ്മിണിക്കുട്ടന്‍, കെ. വിനോദ് കുമാര്‍ സംസാരിച്ചു. സമൂഹത്തിന്റെ വിവിധ മേഖലകളില്‍ ശ്രദ്ധാര്‍ഹമായ പ്രവര്‍ത്തനം നടത്തിയവരെ ചടങ്ങില്‍ ആദരിച്ചു.