വടകര: വ്യാപാരിയെ അക്രമിച്ച് പണവും മൊബൈലും കവര്‍ന്ന കേസില്‍ ഒരാള്‍ കൂടി അറസ്റ്റില്‍. ഇരിങ്ങല്‍ പീടികവളപ്പില്‍ രേവന്ദ് (25) ആണ് പിടിയിലായത്. നേരത്തെ നാലംഗ സംഘം പിടിയിലായിരുന്നു. ഇതോടെ ഈ കേസില്‍ അഞ്ചുപേര്‍ വലയിലായി. മേപ്പയില്‍ കല്ലുനിര പറമ്പത്ത് പ്രവീണ്‍ (23), സഹോദരന്‍ പ്രദീപന്‍ (27), പുതിയാപ്പ് മലയില്‍ ഷിജു (27), റെയില്‍വേ സ്റ്റേഷനു സമീപം കയ്യില്‍ അരുണ്‍കുമാര്‍ (26) എന്നിവരെയാണ് ഇന്‍സ്‌പെക്ടര്‍ ടി. മധുസൂദനന്‍ നായരും റൂറല്‍ എസ്.പിയുടെ ക്രൈം സ്‌ക്വാഡും ചേര്‍ന്ന് കഴിഞ്ഞമാസം പിടികൂടിയത്. കഴിഞ്ഞ ജൂലൈ 25ന് വടകര നഗരമധ്യത്തിലെ കുളത്തിന്റവിട പെട്രോള്‍ പമ്പിനു സമീപം വില്യാപ്പള്ളി സ്വദേശി അഷ്‌റഫ് എന്ന വ്യാപാരിയെ ആക്രമിച്ച് പണവും മൊബൈലും കവര്‍ന്ന കേസിലാണ് അറസ്റ്റ്. ഒന്‍പതംഗ സംഘമാണ് ആക്രമണം നടത്തിയത്. ഇരുമ്പുകട്ട കൊണ്ട് അടിച്ചു പരുക്കേല്‍പ്പിക്കുകയും 67,000 രൂപയും മൊബൈല്‍ ഫോണും കവരുകയും ചെയ്തു. സംഭവത്തിനു ശേഷം ഒളിവിലായിരുന്ന പ്രതികളില്‍ നാലുപേരെയാണ് ആദ്യം അറസ്റ്റ് ചെയ്തത്. നാട്ടില്‍ നിന്നു മുങ്ങിയ രേവന്ദിനെ ഇന്‍സ്‌പെക്ടര്‍ ടി. മധുസൂദനും സീനിയര്‍ സിവില്‍ പൊലിസ് ഓഫിസര്‍ ഹരിദാസനും ചേര്‍ന്നു വടകര റെയില്‍വേ സ്റ്റേഷനില്‍നിന്നാണ് പിടികൂടിയത്.