ഓമശ്ശേരി: ഓമശ്ശേരി പഞ്ചായത്തിലെ അമ്പലക്കണ്ടിയില്‍ മോഷ്ടാവിന്റെ വിളയാട്ടം. ഇയാള്‍ ഒരു വീട്ടില്‍ കവര്‍ച്ച നടത്തുകയും ആറോളം വീടുകളില്‍ കവര്‍ച്ചാ ശ്രമം നടത്തുകയും ചെയ്തു.  അമ്പലക്കണ്ടി നെച്ചൂളി മുഹമ്മദിന്റെ വീട്ടിലെ കോണിക്കൂടിന്റെ വാതില്‍ തകര്‍ത്ത് അകത്തുകയറി ഏഴ് പവന്‍ സ്വര്‍ണം കവര്‍ന്നു. വീട്ടിനുള്ളില്‍ ഉറങ്ങിക്കിടക്കുകയായിരുന്ന മുഹമ്മദിന്റെ മരുമകളുടെ അഞ്ച് പവന്‍ മാലയും രണ്ട് പവന്‍ നെക്‌ലേസുമാണ് കവര്‍ന്നത്. കവര്‍ച്ചാ ശ്രമത്തിനിടെ ഇവര്‍ ബഹളം വെച്ചതോടെ വീട്ടുകാര്‍ ഉണരുകയും മോഷ്ടാവ് സ്വര്‍ണവുമായി രക്ഷപ്പെടുകയുമായിരുന്നു.  രാത്രി 11ഓടെ ആരംഭിച്ച മോഷണശ്രമം പുലര്‍ച്ചെ നാല് വരെ നീണ്ടതായി കരുതുന്നു. ഈ സമയത്തിനിടയിലാണ് പ്രദേശത്തെ മറ്റ് വീടുകളിലും ഇയാള്‍ കയറിയത്. സി.സി.ടി.വി കാമറയില്‍ ഇയാളുടെ ദൃശ്യം പതിഞ്ഞിട്ടുണ്ട്. ഒരു വീട്ടില്‍നിന്നും ലഭിച്ച കോണി ഉപയോഗിച്ച് വീടുകളുടെ മുകളില്‍ കയറി കോണിക്കൂടിന്റെ വാതില്‍ തകര്‍ത്താണ് ഭൂരിഭാഗം വീടുകളിലും മോഷണ ശ്രമം നടത്തിയിട്ടുള്ളത്. ഡോഗ് സ്‌ക്വാഡ് സ്ഥലത്തെത്തി പരിശോധന നടത്തി. അന്വേഷണം ആരംഭിച്ചതായി പൊലിസ് പറഞ്ഞു.