റിയാദ്: കഴിഞ്ഞ ദിവസം സഊദിയിലെ റാബികിൽ വെച്ചുണ്ടായ അപകടത്തിൽ മരണപ്പെട്ട റാബിക് ഖാലിദ് ഇദ്‌രീസ് ആശുപത്രി ജീവനക്കാരൻ മലപ്പുറം തവനൂർ തൃക്കണാപുരം സ്വദേശി അബ്‌ദുൾ വാഹിദിന്റെ മയ്യിത്ത് നിയമ നടപടികൾ പൂർത്തിയാക്കി റാബികിൽ മറവ് ചെയ്‌തു. ചൊവ്വാഴ്ച അസർ നിസ്‌കാരത്തിന് ശേഷം റാബിക് ഖബർസ്ഥാനിലാണ് മയ്യിത്ത് ഖബറടക്കിയത്. കഴിഞ്ഞ ഞായറാഴ്ച രാത്രി കടയിൽ നിന്നും സാധനം വാങ്ങി നടന്ന് വരുമ്പോൾ സ്വദേശി പൗരൻ ഓടിച്ച വാഹനം ഇടിച്ച് തെറിപ്പിച്ചുണ്ടായ അപകടത്തിലാണ് അബ്‌ദുൽ വാഹിദ് മരണപ്പെട്ടത്. കോറോത്ത് പുളിക്കൽ തൊടികയിൽ യൂസഫിന്‍റെയും ഫാത്തിമയുടെയും മകനാണ്. ഭാര്യ സുഹ്‌റ.

നിയമ നടപടികൾ പൂർത്തീകരിക്കുന്നതിനും മയ്യിത്ത് ഖബറടക്കത്തിനും റാബിക് കെഎംസിസി സെൻട്രൽ കമ്മിറ്റി നേതാക്കളായ അബ്‌ദുൽ കരീം പോത്തുകല്ല്, അബ്‌ദുൽ ഗഫൂർ ചേലേമ്പ്ര, സയ്യിദ് കുഞ്ഞിക്കോയ തങ്ങൾ, റഫീഖ് ചുങ്കത്തറ, മൊയ്‌തീൻകോയ പുകയൂർ, അബ്‌ദുൽ ഗഫൂർ പളളിയാളി ഹാറൂൺ റഷീദ്, മുസ്‌തഫ വലിയപറമ്പ്, ഫഹദ് മലപ്പുറം, തുടങ്ങിയവർ നേതൃത്വം നൽകി.