ഫാറൂഖ് കോളജ്: പാര്‍ലമെന്റ് പാസാക്കിയ പൗരത്വ ഭേദഗതി ബില്ലിനെതിരെ (CAB) ഫാറൂഖ് കോളജ് വിദ്യാര്‍ഥികളുടെ പ്രതിഷേധം. ക്ലാസ് ബഹിഷ്‌കരിച്ച് നടത്തിയ ലോങ് മാര്‍ച്ചിനൊപ്പം പ്രതിഷേധിക്കാന്‍ അധ്യാപകരും അണിചേര്‍ന്നു.

ഫാറൂഖ് കോളജ് ക്യാംപസില്‍ നിന്ന് തുടങ്ങിയ മാര്‍ച്ച് ചുങ്കത്താണ് സമാപിച്ചത്. വിവിധ വിദ്യാര്‍ഥി സംഘടനകളുടെ പ്രവര്‍ത്തകരും ലോങ് മാര്‍ച്ചില്‍ പങ്കെടുത്തു. ഫാറൂഖ് കോളജ് വിദ്യാര്‍ഥി യൂനിയനാണ് മാര്‍ച്ചിന് നേതൃത്വം നല്‍കിയത്.

രാവിലെ ഒന്‍പതു മണിക്ക് തുടങ്ങിയ മാര്‍ച്ചില്‍ ക്യാംപസിലെ ഭൂരിഭാഗം വിദ്യാര്‍ഥികളും സംബന്ധിച്ചു. പ്രധാന കവാടത്തിന് പുറത്ത് നടത്തിയ ധര്‍ണയില്‍ അധ്യാപകരും അനധ്യാപക ജീവനക്കാരും പങ്കുചേര്‍ന്നു.