കോഴിക്കോട്: ദേശീയ ജൂനിയര്‍ സ്‌കൂള്‍ അത്‌ലറ്റിക് ചാംപ്യന്‍ഷിപ്പില്‍ പങ്കെടുക്കാന്‍ കൗമാരം ഇന്ന് ഇന്ദ്രപ്രസ്ഥത്തിലേക്ക് യാത്രതിരിക്കും. ത്യാഗരാജ സ്റ്റേഡിയത്തില്‍ 14 മുതല്‍ 19 വരെയാണ് ചാംപ്യന്‍ഷിപ്പ്. നിലവിലെ ജേതാക്കളായ കേരളം കിരീട പ്രതീക്ഷയുമായാണ് 64 ാമത് ദേശീയ ചാംപ്യന്‍ഷിപ്പില്‍ പങ്കെടുക്കാന്‍ യാത്രതിരിക്കുന്നത്. കായിക താരങ്ങളും ഒഫിഷ്യല്‍സും ഉള്‍പ്പെടെ 74 അംഗ സംഘമാണ് കേരളത്തിന്റേത്. ചാംപ്യന്‍ഷിപ്പിനുള്ള സംഘത്തില്‍ 36 ആണ്‍കുട്ടികളും 30 പെണ്‍കുട്ടികളുമാണ്. എട്ടു ഒഫിഷ്യല്‍സും കൂടെയുണ്ട്. ജിജി ജോണ്‍ ആണ് ജനറല്‍ മാനേജര്‍. ജാഫര്‍ഖാന്‍, അജയ് രാജ്, നന്ദഗോപാല്‍, പി.എം ഷിജു, ജിക്കു ചെറിയാന്‍, സൂര്യമോള്‍, ബീന എന്നിവരാണ് ടീമിനെ അനുഗമിക്കുന്നത്. ഇന്ന് ഉച്ചയ്ക്ക് 1.30ന് എറണാകുളത്ത്‌നിന്ന് മംഗള എക്‌സ്പ്രസിലാണ് ടീം യാത്ര തിരിക്കുന്നത്. ടീമിന്റെ പരിശീലന ക്യാംപ് തിരുവനന്തപുരത്ത് പൂര്‍ത്തിയായി. കഴിഞ്ഞ തവണ ഭോപ്പാലില്‍ വളഞ്ഞ വഴിയിലൂടെ കേരളത്തിന് ഓവറോള്‍ കിരീടം ആതിഥേയരായ മധ്യപ്രദേശ് നിഷേധിച്ചിരുന്നു. അത്‌ലറ്റിക്‌സിനൊപ്പം ഗെയിംസ് മത്സരങ്ങളും ഉള്‍പ്പെടുത്തിയാണ് ചാംപ്യന്മാരായിട്ടും കേരളത്തിന് കിരീടം നിഷേധിച്ചത്. 116 പോയിന്റോടെയാണ് കേരളം കഴിഞ്ഞ തവണ ജേതാക്കളായത്. 13 സ്വര്‍ണവും എട്ട് വെള്ളിയും നാല് വെങ്കലവും നേടിയാണ് കഴിഞ്ഞ തവണ കേരളം ഓവറോള്‍ ചാംപ്യന്മാരായത്.