കൊച്ചി: പാലാരിവട്ടം മെട്രോ സ്റ്റേഷന് സമീപം യുവാവ് കുഴിയില്‍ വീണ് മരിച്ച സംഭവത്തില്‍ നാല് പൊതുമരാമത്ത് വകുപ്പ് ഉദ്യോഗസ്ഥര്‍ക്ക് സസ്‌പെന്‍ഷന്‍.
കുഴിക്ക് സമീപം അപകട മുന്നറിയിപ്പ് ബോര്‍ഡ് സ്ഥാപിക്കാതെയും ബാരിക്കേഡ് നിര്‍മിക്കാതെയും കൃത്യനിര്‍വഹണത്തില്‍ വീഴ്ചവരുത്തിയ എറണാകുളം നിരത്ത് ഉപവിഭാഗം അസിസ്റ്റന്റ് എക്‌സിക്യൂട്ടീവ് എന്‍ജിനീയര്‍ സൂസന്‍ സോളമന്‍ തോമസ്, നിരത്ത് വിഭാഗം എറണാകുളം സെക്ഷന്‍ അസിസ്റ്റന്റ് എന്‍ജിനീയര്‍ കെ.എന്‍ സുര്‍ജിത്, എറണാകുളം നിരത്ത് പരിപാലന വിഭാഗം അസിസ്റ്റന്റ് എക്‌സിക്യൂട്ടീവ് എന്‍ജിനീയര്‍ ഇ.പി സൈനബ, എറണാകുളം നിരത്ത് പരിപാലന വിഭാഗം അസിസ്റ്റന്റ് എന്‍ജിനീയര്‍ ടി.കെ ദീപ എന്നിവരെയാണ് സസ്‌പെന്‍ഡ് ചെയ്യാന്‍ പൊതുമരാമത്ത് മന്ത്രി ജി.സുധാകരന്‍ നിര്‍ദേശം നല്‍കിയത്.
പൊതുമരാമത്ത് റോഡുകളില്‍ അപകടകരമായ കുഴികള്‍ ഉണ്ടാകുമ്പോള്‍ അപകട മുന്നറിയിപ്പ് നല്‍കണമെന്നും ബാരിക്കേഡ് നിര്‍മിക്കണമെന്നും സര്‍ക്കാര്‍ നിര്‍ദേശം നല്‍കിയിട്ടുണ്ട്.
സംഭവം വിശദമായി അന്വേഷിക്കുന്നതിന് പൊതുമരാമത്ത് വകുപ്പ് ഡെപ്യൂട്ടി ചീഫ് എന്‍ജിനീയറെ (വിജിലന്‍സ്) ചുമതലപ്പെടുത്തുകയും ചെയ്തു.