മലപ്പുറം: വളാഞ്ചേരി മര്‍കസ് 30ാം വാര്‍ഷിക, വാഫി, വഫിയ്യ, ഹിഫ്‌സ് സനദ്ദാന മെഗാ സമ്മേളനം ഇന്നു തുടങ്ങും. 'വൈജ്ഞാനിക വിപ്ലവത്തിന്റെ മുപ്പതാണ്ട് ' എന്ന ശീര്‍ഷകത്തില്‍ മൂന്നു ദിവസം നീളുന്ന സമ്മേളന നഗരി പൂക്കോയ തങ്ങളുടെ പേരിലാണ് സജ്ജീകരിച്ചിരിക്കുന്നത്. ആറിനു സമാപിക്കും.
ഇന്നു രാവിലെ ഒന്‍പതിന് പാണക്കാട് സാദാത്തീങ്ങള്‍, മര്‍കസ് സ്ഥാപകന്‍ കെ.കെ അബൂബക്കര്‍ ഹസ്രത്ത് താനൂര്‍, സ്ഥാപക സെക്രട്ടറി കെ.ടി കുഞ്ഞുട്ടി ഹാജി എന്നിവരുടെ മഖ്ബറ സിയാറത്തിനു മര്‍കസ് വാഫി കോളജ് വൈസ്. പ്രിന്‍സിപ്പല്‍ പ്രൊഫ. കുഞ്ഞാമു ഫൈസി താനൂര്‍, കെ.കെ.എച്ച്.എം ഇസ്‌ലാമിക് ആന്‍ഡ് ആര്‍ട്‌സ് കോളജ് ലക്ചറര്‍ പ്രൊഫ. എം.കെ അബ്ദുല്ല ഫൈസി കൊടശ്ശേരി, മര്‍കസ് പ്രൊഫ. മുഹമ്മദ് കുട്ടി ഫൈസി എന്നിവര്‍ നേതൃത്വം നല്‍കും. പാണക്കാട് സയ്യിദ് ഹൈദരലി ശിഹാബ് തങ്ങള്‍, സമസ്ത കേന്ദ്ര മുശാവറ അംഗം എ. മരക്കാര്‍ ഫൈസി, മുഹമ്മദ് ദാരിമി വെന്നിയൂര്‍ എന്നിവര്‍ പ്രാര്‍ഥന നിര്‍വഹിക്കും.
വൈകിട്ടു നാലിനു മജ്‌ലിസുന്നൂര്‍ ആത്മീയ സംഗമത്തിനു കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി നേതൃത്വം നല്‍കും. പാണക്കാട് സയ്യിദ് അബ്ബാസലി ശിഹാബ് തങ്ങള്‍ പതാക ഉയര്‍ത്തും. ഉദ്ഘാടന സമ്മേളനം പാണക്കാട് സയ്യിദ് ബഷീറലി ശിഹാബ് തങ്ങള്‍ ഉദ്ഘാടനം ചെയ്യും.
സമസ്ത കേരള ഇസ്‌ലാംമത വിദ്യാഭ്യാസ ബോര്‍ഡ് ജനറല്‍ സെക്രട്ടറി എം.ടി അബ്ദുല്ല മുസ്‌ലിയാര്‍ അധ്യക്ഷനാകും. അഹ്മദ് കബീര്‍ ബാഖവി കാഞ്ഞാര്‍ മുഖ്യഭാഷണം നടത്തും.
ചെമ്പുലങ്ങാട് മുഹമ്മദ്കുട്ടി മുസ്‌ലിയാര്‍ പ്രാര്‍ഥന നിര്‍വഹിക്കും.
പരിപാടിയുടെ ഭാഗമായി വിദ്യാതീരം, മര്‍കസ് കുടുംബ സംഗമം, ന്യൂനപക്ഷ സമ്മേളനം, പുതുതായി നിര്‍മിക്കുന്ന വിവിധ കെട്ടിടോദ്ഘാടനം എന്നിവ നടക്കും.
ആറിനു വൈകിട്ട് 7.15നു സമാപന സമ്മേളനം യു.എ.ഇ പ്രസിഡന്റിന്റെ മുഖ്യ ഉപദേഷ്ടാവ് സയ്യിദ് അലി അബ്ദുര്‍റഹ്മാന്‍ അല്‍ ഹാശിമി ഉദ്ഘാടനം ചെയ്യും.
പാണക്കാട് സയ്യിദ് ഹൈദരലി ശിഹാബ് തങ്ങള്‍ അധ്യക്ഷനാകും. സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ പ്രാര്‍ഥന നടത്തും. വാര്‍ത്താസമ്മേളനത്തില്‍ മര്‍കസ് സെക്രട്ടറി ഹംസക്കുട്ടി ബാഖവി, കെ.കെ.എസ് തങ്ങള്‍ വെട്ടിച്ചിറ, കെ.വി ഹംസ മുസ്‌ലിയാര്‍, കാടാമ്പുഴ മൂസ ഹാജി, കെ. ഇബ്‌റാഹീം ഹാജി പങ്കെടുത്തു.