കോഴിക്കോട് :ആന്ധ്രപ്രദേശില്‍ സ്ത്രീ സുരക്ഷ ഉറപ്പാക്കുന്നതിന്റെ ഭാഗമായി രൂപം നല്‍കിയ ദിശ നിയമം കേരളത്തിലും നടപ്പാക്കുന്ന കാര്യം പരിഗണനയില്‍. ബലാത്സംഗത്തിനിരയായി കൊല്ലപ്പെട്ട വെറ്റിനറി ഡോക്ടറുടെ സ്മരണയ്ക്കായാണ് ആന്ധ്രാപ്രദേശ് ദിശാ ആക്ട് ക്രിമിനല്‍ ലോ(എ.പി ഭേദഗതി) ആക്ട് 2019 എന്ന പുതിയ നിയമത്തിന് രൂപം നല്‍കിയത്. ബലാല്‍സംഗക്കേസുകളില്‍ 21 ദിവസത്തിനകം പ്രതികള്‍ക്ക് വധശിക്ഷ അടക്കമുള്ള കടുത്ത ശിക്ഷ ഉറപ്പാക്കുന്ന നിയമമാണ് ആന്ധ്രയില്‍ നിയമസഭ പാസാക്കിയത്.

സ്ത്രീകളുടെയും കുട്ടികളുടെയും സുരക്ഷയ്ക്ക് ആന്ധ്ര മോഡല്‍ നിയമഭേദഗതി പരിഗണനയിലാണെന്ന് മന്ത്രി കെ.കെ ശൈലജ പറഞ്ഞു. ആവശ്യമെങ്കില്‍ ഭേദഗതി കേരളത്തിലും നടപ്പാക്കും. ആന്ധ്രയിലെ നിയമഭേദഗതിയെക്കുറിച്ച് വിശദമായി പഠിച്ചുകൊണ്ടിരിക്കുകയാണെന്ന് മന്ത്രി കൂട്ടിച്ചേര്‍ത്തു.

കേരളത്തിലിപ്പോഴുള്ള നിയമം കടുത്തതാണ്. നിയമത്തിന്റെ അഭാവം ഇപ്പോഴില്ല. ഉള്ള നിയമങ്ങള്‍ തന്നെ ഏറ്റവും നന്നായി നടപ്പാക്കാന്‍ കഴിയാത്തതാണ് പ്രശ്‌നം. അതിന് ഒരുക്കമായാല്‍ തന്നെ നമുക്ക് കുറേ കാര്യങ്ങള്‍ ചെയ്യാന്‍ സാധിക്കും. നിയമം പ്രാവര്‍ത്തികമാക്കുന്നതിലാണ് നീതിപീഠങ്ങള്‍ക്ക് അടക്കം വീഴ്ച വരുന്നതെന്നും മന്ത്രി പറഞ്ഞു.