പേരാമ്പ്ര: കല്ലോട്ട് ഇന്നലെ രാത്രി വീണ്ടും ആക്രമണം. തച്ചടുത്ത് കണ്ടിയിലെ കീഴലത്ത് കുഞ്ഞിരാമനും മകന്‍ ആര്‍.എസ്.എസ് പേരാമ്പ്ര ബൗദ്ധിക് ശിക്ഷണ്‍ പ്രമുഖ് കെ.പി പ്രസൂണിനും വെട്ടേറ്റു. ഇവരെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. രാത്രി ഒന്‍പതരയോടെയാണു സംഭവം. ഇരുവരും വീട്ടിലേക്കു പോകുംവഴി ബൈക്കിലെത്തിയ സംഘം ആക്രമിക്കുകയായിരുന്നെന്നാണു ലഭിക്കുന്ന വിവരം. സി.പി.എം-ബി.ജെ.പി അക്രമ പരമ്പര അരങ്ങേറിയതിന്റെ പേരില്‍ പത്തുദിവസം മുന്‍പ് ഇവിടെ സമാധാന സന്ദേശയാത്ര നടന്നിരുന്നു. പ്രദേശത്ത് സംഘര്‍ഷം നിലനില്‍ക്കുകയാണ്. പേരാമ്പ്ര സി.ഐ കെ.പി സുനില്‍ കുമാറിന്റെ നേതൃത്വത്തില്‍ പൊലിസ് സ്ഥലത്തെത്തിയിട്ടുണ്ട്.