ആലപ്പുഴ: പാലാരിവട്ടത്ത് റോഡിലെ കുഴിയില്‍ വീണ് യുവാവ് മരിച്ച സംഭവത്തില്‍ സര്‍ക്കാരിനെതിരെ ഹൈക്കോടതി നടത്തിയ പരാമര്‍ശത്തിന് മറുപടിയുമായി പൊതുമരാമത്ത് വകുപ്പ് മന്ത്രി ജി സുധാകരന്‍.
കോടതികളില്‍ കേസുകള്‍ കെട്ടിക്കുന്നത് ജഡ്ജിമാരുടെ കുറ്റമാണോയെന്ന് സുധാകരന്‍ ചോദിച്ചു. റോഡിലെ കുഴി അടയ്ക്കാനുള്ള ഉത്തരവാദിത്വം എല്ലാവര്‍ക്കുമുണ്ടെന്നും മന്ത്രി പറഞ്ഞു.
പാലാരിവട്ടം അപകടത്തില്‍ യുവാവിന് ജീവന്‍ നഷ്ടമായ സംഭവത്തില്‍ സര്‍ക്കാരിനെ ഹൈക്കോടതി രൂക്ഷമായി വിമര്‍ശിച്ചിരുന്നു. ഇതിനെതിരെയുള്ള മറുപടിയായിരുന്നു മന്ത്രി ജി സുധാകരന്‍ നല്‍കിയത്.
മൂക്കില്‍ വിരല്‍വച്ചിട്ട് കാര്യമില്ല. കേരളത്തില്‍ ആണ് നമ്മള്‍ ജീവിക്കുന്നത്. സ്റ്റാഫും ജഡ്ജിമാരും കുറവുള്ളത് കൊണ്ടല്ലേ കോടതികളില്‍ കേസ് കെട്ടിക്കിടക്കുന്നതെന്ന് മന്ത്രി ചോദിച്ചു. 700 കോടി രൂപ സര്‍ക്കാര്‍ കോടതി കെട്ടിടങ്ങള്‍ക്ക് നല്‍കി.
റോഡിലെ കുഴി അടയ്ക്കാനുള്ള ഉത്തരവാദിത്വം എല്ലാവര്‍ക്കുമുണ്ട്. കുറ്റം ചെയ്തവര്‍ക്ക് എതിരെ തിരിയണം. അല്ലാതെ പൊതുവേ പറയരുത്. എറണാകുളം നഗരത്തിലെ കുഴി അടക്കാന്‍ മാത്രം കൊടുത്തത് ഏഴ് കോടി രൂപയാണ്.
ഒക്ടോബറില്‍ പണം കൈമാറിയതാണ്. മരണം സംഭവിച്ചതില്‍ പൊതുമരാമത്ത് വകുപ്പിനും ജല വകുപ്പിനും ഉത്തരവാദിത്വമുണ്ടെന്നും സുധാകരന്‍ പറഞ്ഞു.