കൊല്ലം: ഫാത്തിമാ മാതാ കോളജിലെ വിദ്യാര്‍ഥിനിയായിരുന്ന രാഖിയുടെ മരണത്തിന് ഉത്തരവാദികളായ മൂന്ന് അധ്യാപകരെ കോളജ് മാനേജ്‌മെന്റിന്റെ പ്രാഥമിക അന്വേഷണത്തില്‍ കണ്ടെത്തിയതിനെ തുടര്‍ന്ന് കഴിഞ്ഞ 3ന് കോളജില്‍ നിന്ന് പുറത്താക്കിയെന്ന് കോളജ് പ്രിന്‍സിപ്പല്‍ അറിയിച്ചിരുന്നു.
എന്നാല്‍ ഈ അധ്യാപകര്‍ക്കെതിരെ ഇതുവരെ രേഖാമൂലമുള്ള ഒരു നടപടിയും കോളജോ, കോളജ് മാനേജ്‌മെന്റോ, യൂനിവേഴ്‌സിറ്റിയോ എടുത്തിട്ടില്ലെന്ന് കെ.എസ്.യു ജില്ലാ പ്രസിഡന്റ് വിഷ്ണ വിജയന്‍ ആരോപിച്ചു. രാഖിയുടെ മരണവുമായി ബന്ധപ്പെട്ട് വിദ്യാര്‍ഥികള്‍ക്കിടയിലുണ്ടായ പ്രതിഷേധത്തെ വഴിതിരിച്ചുവിടാന്‍ മാത്രമായിരുന്നു നടപടി.
ഇത് പ്രഹസനമാണെന്നും കെ.എസ്.യു ആരോപിച്ചു. കോളജ് വിദ്യാര്‍ഥികള്‍ രാഷ്ട്രീയത്തിനു അധീതമായി നടത്തിവന്ന സമരത്തെ ഹൈജാക് ചെയ്തു കൊണ്ട് 3ന് എസ്.എഫ്.ഐയും, കോളേജ് മാനേജ്‌മെന്റും നടത്തിയ നാടകം മാത്രമായിരുന്നു അധ്യാപകരെ പുറത്താക്കല്‍.
പുറത്താക്കിയ അധ്യാപകര്‍ ഇപ്പോഴും ജോലിയില്‍ തുടരുന്നത് ഇതിനു ഉദാഹരണമാണ്. പുറത്താക്കല്‍ ഉത്തരവ് ആവശ്യപ്പെട്ട് പ്രിന്‍സിപ്പിലിനെ ഇന്ന് കെ.എസ്.യു നേതാക്കള്‍ സമീപിച്ചപ്പോള്‍ നടപടിയെ കുറിച്ച് അറിയില്ലായെന്നും നടപടിയെ സംബന്ധിച്ച് ഉത്തരവുകള്‍ ഇറങ്ങിയിട്ടില്ലെന്നുമാണ് പ്രിന്‍സിപ്പല്‍ അറിയിച്ചത്.
ഫാത്തിമാ മാതാ കോളജിലെ വിദ്യാര്‍ഥികള്‍ നടത്തിയ സമരത്തെ മാനേജ്‌മെന്റിന് ഒറ്റികൊടുത്ത എസ്.എഫ്.ഐ നേതൃത്വം പരസ്യമായി മാപ്പ് പറയണമെന്ന് കെ.എസ്.യു ജില്ലാ കമ്മിറ്റി ആവശ്യപ്പെട്ടു. രാഖിയുടെ മരണത്തിനു ഉത്തരവാദികളായ അധ്യാപകര്‍ക്കും മാനേജമെന്റിനുമെതിരെ വരും ദിവസങ്ങളില്‍ സമരം തുടങ്ങുമെന്നും കെ.എസ്.യു ജില്ലാ പ്രസിഡന്റ് വിഷ്ണു വിജയന്‍ എന്നിവര്‍ പ്രസ്താവനയില്‍ അറിയിച്ചു.