കോട്ടയം: സ്വാശ്രയ സ്ഥാപനങ്ങളുടെ നടത്തിപ്പ് ചുമതലയുള്ള സഹകരണ സൊസൈറ്റിക്ക് 50 കോടി നല്‍കാനുള്ള എം.ജി സര്‍വകലാശാലാ സിന്‍ഡിക്കേറ്റിന്റെ തീരുമാനവുമായി ബന്ധപ്പെട്ട് ഗവര്‍ണര്‍ വിശദീകരണം തേടി. ഫണ്ട് കൈമാറാനുള്ള നീക്കം തടയണമെന്നാവശ്യപ്പെട്ട് എം.ജി യൂനിവേഴ്‌സിറ്റി എംപ്ലോയീസ് യൂനിയന്‍ നല്‍കിയ പരാതിയുടെ അടിസ്ഥാനത്തിലാണ് നടപടി.
ശമ്പളവും പെന്‍ഷനും നല്‍കുന്നതടക്കം സര്‍വകലാശാല ഗുരുതരമായ സാമ്പത്തിക പ്രതിസന്ധി നേരിടുമ്പോള്‍ 50 കോടി സൊസൈറ്റിക്ക് കൈമാറുന്ന നീക്കത്തിനെതിരേ എംപ്ലോയീസ് യൂനിയന്‍ പ്രക്ഷോഭം നടത്തിവരികയാണ്. ഇതിനേത്തുടര്‍ന്ന് ഫണ്ട് കൈമാറ്റം നടന്നിട്ടില്ല.
ജീവനക്കാരുടെ ശക്തമായ എതിര്‍പ്പിനെ തുടര്‍ന്ന് ഓഗസ്റ്റ് രണ്ടിന് കൂടിയ സിന്‍ഡിക്കേറ്റും ഇതുസംബന്ധിച്ച് തീരുമാനമെടുക്കാതെ പിരിയുകയായിരുന്നു.
അതേസമയം, സ്വാശ്രയ സൊസൈറ്റിക്ക് സാമ്പത്തിക പ്രതിസന്ധിയില്ലെന്ന് എം.ജി സര്‍വകലാശാല വൈസ് ചാന്‍സിലര്‍ ഡോ.ബാബു സെബാസ്റ്റിയന്‍ പറഞ്ഞു.
ഇത്തവണ പ്രവേശനം നേടിയ വിദ്യാര്‍ഥികളുടെ ഫീസ് സൊസൈറ്റിയാണ് പിരിച്ചത്. സൊസൈറ്റിക്ക് അര്‍ഹതപ്പെട്ട 130 കോടി സര്‍വകലാശാലയിലുണ്ടെന്ന പ്രചാരണം ശരിയല്ല. ഇതില്‍ 84 കോടിയോളം രൂപ നിലവില്‍ കെട്ടിടനിര്‍മാണ ആവശ്യങ്ങള്‍ക്കായി ചെലവഴിച്ചിട്ടുണ്ട്.
എസ്.എം.ഇയിലെ അധ്യാപകരുടെ നിയമത്തില്‍ ക്രമവിരുദ്ധമായ പല നടപടികളും നടന്നതായി സംശയിക്കുന്നുണ്ട്. ഇതാണ് അന്വേഷണം പ്രഖ്യാപിക്കാന്‍ കാരണം.
നിശ്ചിത യോഗ്യതയില്ലാത്തവര്‍ക്കും യു.ജി.സി ശമ്പള സ്‌കെയില്‍ അനുവദിക്കാനുള്ള കോടതി ഇത്തരവിനെതിരേ അപ്പീല്‍ നല്‍കുന്ന കാര്യം ലീഗല്‍ കമ്മിറ്റി പരിശോധിക്കുമെന്നും അദ്ദേഹം പറഞ്ഞു.