കണ്ണൂര്‍: കണ്ണൂര്‍ കോര്‍പറേഷന്റെ ചേലോറ മാലിന്യ സംസ്‌കരണ കേന്ദ്രത്തില്‍ പ്ലാസ്റ്റിക് ഷണ്ടിങ് യൂനിറ്റിനായി കണ്ടെത്തിയ സ്ഥലം വീണ്ടും മാറ്റാന്‍ കോര്‍പറേഷന്‍ കൗണ്‍സില്‍ തീരുമാനം.
ഇതിനായി ചേലോറയില്‍ തന്നെ പുതിയ സ്ഥലം കണ്ടെത്തണമെന്നാണ് പുതിയ ആവശ്യം. നേരത്തെ കണ്ടെത്തിയ സ്ഥലം റോഡരികിലാണെന്നതിനാല്‍ മാറ്റാന്‍ ശുപാര്‍ശ ചെയ്യുകയായിരുന്നു. ഇതോടെ ചേലോറയിലെ പ്ലാസ്റ്റിക് ഷണ്ടിങ് യൂനിറ്റ് ഇനിയും വൈകും. ഇതിനിടയില്‍ മറ്റൊരു ഡിവിഷനിലേക്ക് യൂനിറ്റ് നീക്കാനുള്ള ശ്രമവും നടന്നിരുന്നു. എന്നാല്‍ ഇതിനെ പ്രതിപക്ഷ അംഗങ്ങള്‍ നിരാകരിച്ചു. തുടര്‍ന്നാണ് ചേലോറയില്‍ തന്നെ ഇതിനുള്ള സ്ഥലം കണ്ടെത്താന്‍ തീരുമാനിച്ചത്. 23 ഏക്കര്‍ സ്ഥലത്താണ് ചേലോറ മാലിന്യസംസ്‌കരണ കേന്ദ്രം സ്ഥിതി ചെയ്യുന്നത്. 2016-17 വാര്‍ഷിക പദ്ധതിയില്‍ ഉള്‍പ്പെടുത്തി 6.44 ലക്ഷം രൂപയാണ് യൂനിറ്റിന്റെ നിര്‍മാണത്തിനായി അസി.എന്‍ജിനിയര്‍ കണക്കാക്കിയിരിക്കുന്നത്.
കോര്‍പറേഷന്‍ പരിധിയില്‍ ബങ്കുകള്‍ കൈമാറ്റം ചെയ്യുന്നതില്‍ പൊതുമാനദണ്ഡത്തിന് രൂപം നല്‍കാനും കൗണ്‍സില്‍ യോഗത്തില്‍ തീരുമാനിച്ചു. ഇതിനായി സര്‍വകക്ഷിയോഗം ചേരും. ബങ്കുകള്‍ കൈമാറ്റം ചെയ്യാന്‍ അനുമതി ചോദിക്കുന്നതില്‍ സാമ്പത്തിക താല്‍പര്യങ്ങളാണെന്ന ചര്‍ച്ചയെ തുടര്‍ന്നാണ് തീരുമാനം. നഗരത്തിലെ മൂന്ന് ഇ-ടോയ്‌ലറ്റുകളുടെ നാളിതുവരെയുള്ള വെള്ളത്തിന്റെ കുടിശിക നല്‍കാത്തതിനാല്‍ നടത്തിപ്പ് ചുമതല കൈമാറ്റം ചെയ്യാന്‍ കഴിയാത്ത സാഹചര്യമുണ്ട്. വൈദ്യുതി കുടിശ്ശിക അടച്ചു തീര്‍ത്തിട്ടുണ്ട്. കുടിശിക നല്‍കിയതിനുശേഷം ആന്വല്‍ മെയിന്റനന്‍സ് കോണ്‍ട്രാക്ട് ഇറാം സയന്റിഫിക് എന്ന സ്ഥാപനത്തിന് നല്‍കും. മന്ത്രി രാമചന്ദ്രന്‍ കടന്നപ്പള്ളിയുടെ ആസ്തി വികസന ഫണ്ടില്‍ നിന്ന് 4,90,000 രൂപ ചെലവിലാണ് നിര്‍മാണം. ലൈഫ് മിഷന്‍ പദ്ധതിയുടെ ലിസ്റ്റില്‍ ഉള്‍പ്പെടാത്ത അര്‍ഹരായവര്‍ക്ക് വരുന്ന 10ാം തിയതിക്കുള്ളില്‍ അപ്പീല്‍ കമ്മിറ്റിയുമായി ബന്ധപ്പെടാന്‍ അവസരമുണ്ടെന്നും മേയര്‍ യോഗത്തില്‍ അറിയിച്ചു. 2009 മുതല്‍ 2015 വരെ നടപ്പാക്കിയ ഇ.എം.എസ് ഭവന പദ്ധതി പൂര്‍ത്തിയായ സാഹചര്യത്തില്‍ നഗരസഭാ വിഹിതത്തില്‍ നിന്നു പിന്‍വലിച്ച് ജില്ലാബാങ്കില്‍ നിക്ഷേപിച്ച തുക ലൈഫ് മിഷനിലേക്ക് അനുവദിക്കാന്‍ അപേക്ഷിക്കാനും യോഗത്തില്‍ തീരുമാനിച്ചു. കോര്‍പറേഷന്‍ പുതിയ കെട്ടിടം നിര്‍മിക്കാന്‍ പഴയത് പൊളിച്ചു മാറ്റണമെന്നിരിക്കെ ഓഫിസിന്റെ ഒരു ഭാഗം തെക്കിബസാറിലെ മദര്‍ ആന്‍ഡ് ചൈല്‍ഡ് ഹോസ്പിറ്റല്‍ കെട്ടിടത്തിലേക്ക് താല്‍ക്കാലികമായി മാറ്റും. പുതിയ കെട്ടിടത്തിന്റെ സ്ട്രക്ചറല്‍ ഡ്രോയിങ് സൂക്ഷ്മപരിശോധന നടത്താന്‍ തൃശൂര്‍ ഗവ. എന്‍ജിനിയറിങ് കോളജിലേക്ക് അയച്ചിട്ടുണ്ട്.