തളിപ്പറമ്പ്: അനര്‍ഹര്‍ക്ക് മുന്‍ഗണനാ കാര്‍ഡുകള്‍ ലഭിച്ചതായുള്ള പരാതിയില്‍ അന്വേഷണം ആരംഭിച്ചു.
തെറ്റായ വിവരങ്ങള്‍ നല്‍കി റേഷന്‍ മുന്‍ഗണനാ ലിസ്റ്റില്‍ ഉള്‍പ്പെട്ട അനര്‍ഹരെ കണ്ടെത്താനാണ് തളിപ്പറമ്പ് താലൂക്ക് സപ്ലൈ ഓഫിസറുടെ നേതൃത്വത്തില്‍ വീടുകള്‍ കയറി പരിശോധന തുടങ്ങിയത്. എല്ലാവിധ ആഢംബര സൗകര്യങ്ങളുമുള്ള വീടുകളും വാഹനങ്ങളുമുള്ള വീടുകളാണ് പരിശോധിച്ചത്.
സര്‍ക്കാര്‍, പൊതുമേഖല, സഹകരണ ഉദ്യോഗസ്ഥര്‍, നാലു ചക്രവാഹനമുള്ളവര്‍, ആയിരം സ്‌ക്വയര്‍ ഫീറ്റിന് മുകളില്‍ വീടുള്ളവര്‍, ആദായ നികുതി അടക്കുന്നവര്‍, ഉയര്‍ന്ന സാമ്പത്തിക ശേഷിയുള്ളവര്‍ എന്നിവര്‍ മുന്‍ഗണനാ കാര്‍ഡുകള്‍ കൈപ്പറ്റിയിട്ടുണ്ടെങ്കില്‍ താലൂക്ക് സപ്ലൈ ഓഫിസില്‍ ഹാജരാക്കണമെന്ന നിര്‍ദേശം ലംഘിക്കപ്പെട്ടതിനെ തുടര്‍ന്നാണ് അധികൃതരുടെ നേതൃത്വത്തില്‍ നേരിട്ട് പരിശോധന തുടങ്ങിയത്. ഇന്നലെ തളിപ്പറമ്പ്, തൃഛംബരം, ഏഴാംമൈല്‍, പ്ലാത്തോട്ടം എന്നിവിടങ്ങളില്‍ ഉദ്യോഗസ്ഥര്‍ റെയ്ഡ് നടത്തി തെറ്റായ വിവരങ്ങള്‍ നല്‍കിയ കാര്‍ഡുകള്‍ പിടിച്ചെടുത്തു.
ആഢംബര വീടുകളില്‍ താമസിച്ച് രണ്ട് രൂപ അരി വാങ്ങുന്ന കാര്‍ഡ് കൈവശം വച്ചവരോട് വിശദീകരണം നല്‍കാനും നിര്‍ദേശിച്ചു.
താലൂക്ക് സപ്ലൈ ഓഫിസര്‍ എസ്. സാബു ജോസ്, റേഷനിങ് ഇന്‍സ്‌പെക്ടര്‍മാരായ കെ.കെ.പി ചന്ദ്രശേഖരന്‍, പി. ജയേഷ്, പി. പ്രമോദ് റെയ്ഡില്‍ പങ്കെടുത്തു.