ആലപ്പുഴ : പൊലിസ് സ്റ്റേഷനുകളില്‍ എത്തുന്നവരെ മാനസികമായി പീഡിപ്പിക്കുന്ന സമ്പ്രദായത്തിന് അറുതിവരുത്തുമെന്ന് ജില്ലാ പൊലിസ് മേധാവി എസ് സുരേന്ദ്രന്‍ വാര്‍ത്താസമ്മേളനത്തില്‍ പറഞ്ഞു. സ്റ്റേഷനുകളില്‍ പരാതിയുമായെത്തുന്നവരെ അലോസരപ്പെടുത്തുന്ന തരത്തില്‍ പൊലിസുക്കാര്‍ പെരുമാറുന്നുവെന്ന പരാതി വ്യാപകമായ സാഹചര്യത്തിലാണ് നടപടി. ഇതുസംബന്ധിച്ച് മുഖ്യമന്ത്രി പ്രത്യേക നിര്‍ദേശം തന്നെ നല്‍കിയിട്ടുണ്ടെന്നും പൊലിസ് ചീഫ് പറഞ്ഞു.
നിയമത്തിന് വിധേയമായി കഴിയുന്ന ആര്‍ക്കും ഏതുസമയവും പൊലിസ് സ്റ്റേഷനിലേക്ക് കടന്നുവരാം. പൊലിസിന്റെ സഹായം ഇവര്‍ക്കു ലഭിക്കുമെന്ന് ഉറപ്പ് വരുത്തും. രാത്രിയെന്നോ പകലെന്നോ നോക്കാതെ ഏതുസമയത്തും പൊലീസിന്റെ സഹായം ആവശ്യപ്പെടാം. ഇതിനായി പൊലീസ് സ്റ്റേഷനുകളില്‍ ഇപ്പോള്‍ പ്രവര്‍ത്തിക്കുന്ന സെല്ലുകള്‍ കാര്യക്ഷമമാക്കും.സ്ത്രീകള്‍ക്കും കുട്ടികള്‍ക്കും നേരെ നടക്കുന്ന ഏതുതരം പീഡനങ്ങള്‍ക്കുമെതിരെ കര്‍ശന നടപടി സ്വീകരിക്കും.
പരമാവധി ശിക്ഷ ലഭിക്കുന്നതരത്തില്‍ പ്രതികള്‍ക്കുമേല്‍ വകുപ്പുകള്‍ ചുമത്തും. പൊലിസും മാധ്യമ പ്രര്‍ത്തകരും തമ്മിലുളള ബന്ധം ശക്തിപ്പെടുത്തും. പൊലിസും മാധ്യമ പ്രവര്‍ത്തകരും ഒരു നാണയത്തിന്റെ രണ്ടുവശങ്ങളാണ്. മാധ്യമങ്ങളുടെ സഹായം പൊലീസിന് കൂടുതല്‍ കാര്യക്ഷമമായി പ്രവര്‍ത്തിക്കുന്നതിന് പ്രചോദനമാകും.
ഇതിനായി വാട്ട്‌സ് ആപ്പ് ഗ്രൂപ്പ് രൂപീകരിക്കും. നല്‍കാവുന്ന വിവരങ്ങള്‍ മുഴുവനും നല്‍കും. തിരിച്ചും വിവരങ്ങള്‍ നല്‍കാവുന്നതാണ്. ടെന്‍ഷന്‍ ഫ്രീ പൊലിസ് സ്റ്റേഷനുകള്‍ സൃഷ്ടിക്കുകയെന്നതാണ് ലക്ഷ്യം.
വിദ്യാര്‍ത്ഥികള്‍ക്കിടയില്‍ മയക്കുമരുന്ന് വില്‍പ്പന വ്യാപകമാകുന്ന സാഹചര്യത്തില്‍ കൂടുതല്‍ റെയ്ഡുകളും വ്യാപനവുമായി ബന്ധപ്പെട്ട് പ്രവര്‍ത്തിക്കുന്നവരെ കസ്റ്റഡിയില്‍ എടുക്കാനും നടപടി സ്വീകരിക്കും.
സദാചാര പൊലിസ് പ്രവര്‍ത്തനം അനുവദിക്കില്ല. ഇതിനെതിരെ കര്‍ശന നടപടി സ്വീകരിക്കും. കെട്ടികിടക്കുന്ന പരാതികള്‍ കേസ് ആക്കി കോടതിയില്‍ എത്തിക്കും.
ക്രിമിനല്‍ നടപടികള്‍ ഊര്‍ജിതപ്പെടുത്തും. ഗുണ്ടകളെ ഒതുക്കാന്‍ പ്രത്യേക സ്‌ക്വാഡ് പ്രവര്‍ത്തിക്കും. ദേശീയ പാതകളില്‍ യാത്രക്കാര്‍ക്ക് സുരക്ഷിത യാത്ര ഒരുക്കും. അതേസമയം പൊലിസിന്റെ കാര്യക്ഷമത വര്‍ധിപ്പിക്കുന്നതിനായി ആവശ്യമായ നടപടി സ്വീകരിക്കും. പൊലിസുക്കാരുടെ പ്രശ്‌നങ്ങള്‍ പഠിച്ചശേഷം പരമാവധി പരിഹരിക്കാന്‍ ശ്രമിക്കുമെന്നും പൊലിസ് ചീഫ് പറഞ്ഞു.