കോഴിക്കോട്: രാജ്യത്ത് തലാസീമിയ പ്രതിരോധ പ്രവര്‍ത്തനങ്ങള്‍ക്ക് കേന്ദ്ര സംസ്ഥാന സര്‍ക്കാരുകളുടെ ഉടക്ക്. രക്ത ജന്യരോഗങ്ങള്‍ ഫലപ്രദമായി തടയുന്നതിനും ചികിത്സിക്കുന്നതിനും വേണ്ടി 2016ല്‍ ദേശീയ ആരോഗ്യ ദൗത്യം പുറത്തിറക്കിയ മാര്‍ഗനിര്‍ദേശങ്ങള്‍ അട്ടിമറിച്ചതോടെയാണ് രാജ്യത്ത് പദ്ധതി പാളിപോയത്. ഇത് കാരണം ഹീമോഗ്ലോബിന്റെ കുറവ് മൂലമുള്ള ജനിതക തകരാറ് അനുഭവിക്കുന്ന രോഗികളുടെ എണ്ണം കൂടുകയാണ്. ചികിത്സയോ ജീവന്‍ രക്ഷാ മരുന്നുകളോ ലഭിക്കാതെ രോഗികള്‍ മരിച്ചൊടുങ്ങുകയാണ്. ഓരോ വര്‍ഷവും ഇന്ത്യയില്‍ ചുരുങ്ങിയത് 100 പേരെങ്കിലും ഇങ്ങനെ മരിക്കുന്നുണ്ട്. കര്‍ണാടകത്തില്‍ ഒരു മാസത്തിനിടെ 15 കുട്ടികളാണ് മരിച്ചത്. കേരളത്തില്‍ രണ്ടു മാസത്തിനിടെ 15 കുട്ടികളും മരണമടഞ്ഞു. തലാസീമിയ, സിക്കിള്‍സെല്‍ അനീമിയ പോലുള്ള ജനിതക രക്ത വൈകല്യ രോഗങ്ങള്‍ക്ക് നൂതന ചികിത്സ സൗജന്യമായി നല്‍കാനും രോഗം അടുത്ത തലമുറയിലേക്ക് പടരുന്നത് തടയാനുമുള്ള പദ്ധതിക്കായിരുന്നു എന്‍.ആര്‍.എച്ച്.എം രൂപം നല്‍കിയിരുന്നത്. എന്നാല്‍ കെടുകാര്യസ്ഥതയും പദ്ധതി ഫലപ്രദമായി നടപ്പാക്കാന്‍ കേന്ദ്ര സംസ്ഥാന സര്‍ക്കാരുകള്‍ തയാറാകാത്തതുമാണ് പ്രതിസന്ധി രൂക്ഷമാക്കിയിരിക്കുന്നത്.
ഇന്ത്യയില്‍ ഒരു ലക്ഷം തലാസീമിയ രോഗികളുണ്ടെന്നാണ് കണക്ക്. ഉത്തരേന്ത്യന്‍ സംസ്ഥാനങ്ങളിലാണ് രോഗികള്‍ കൂടുതല്‍ ഉള്ളത്. രാജ്യത്ത് രോഗത്തിന്റെ ജീന്‍ വാഹകരുടെ എണ്ണം ആകെ ജനസംഖ്യയുടെ നാല് ശതമാനമാണ്. ജീന്‍ വാഹകര്‍ തമ്മില്‍ വിവാഹിതരായാല്‍ അതിലുണ്ടാകുന്ന കുട്ടികളില്‍ 25 ശതമാനവും രോഗികളായിരിക്കാമെന്നാണ് കണക്കാക്കുന്നത്. വിവാഹത്തിനു മുന്‍പുള്ള ബ്ലഡ് സ്‌ക്രീനിങിലൂടെയും ഗര്‍ഭധാരണത്തിന്റെ പ്രാരംഭ ദശയിലെ സ്‌കാനിങിലൂടെയും രോഗത്തിന്റെ സാധ്യത തിരിച്ചറിയാനാവും.
സ്‌ക്രീനിങ്ങും സ്‌കാനിങ്ങും നടത്തി അടുത്ത തലമുറയില്‍ രോഗം വരാതിരിക്കാനുള്ള പദ്ധതികള്‍ക്കായിരുന്നു സര്‍ക്കാര്‍ ലക്ഷ്യമിട്ടിരുന്നത്. ഗ്രീസ്, സൈപ്രസ് തുടങ്ങിയ രാജ്യങ്ങള്‍ ഇങ്ങനെ രോഗം പൂര്‍ണമായി തടഞ്ഞിട്ടുണ്ട്. കേരളത്തില്‍ രോഗികളുടെ എണ്ണം ആയിരത്തോളം വരും. രക്തജന്യ രോഗങ്ങള്‍ തടയുന്നതിനും ചികിത്സിക്കുന്നതിനും സംസ്ഥാന സര്‍ക്കാര്‍ ഒരു വര്‍ഷം മുന്‍പ് പദ്ധതിയിട്ടിരുന്നു. തിരുവനന്തപുരം മെഡിക്കല്‍ കോളജിലും ആലുവ ജനറല്‍ ആശുപത്രിയിലും കോഴിക്കോട് മെഡിക്കല്‍ കോളജിലും ഇതിന് വേണ്ടി മൂന്ന് കേന്ദ്രങ്ങള്‍ തുടങ്ങാനുംതീരുമാനിച്ചിരുന്നു. എന്നാലിത് പൂര്‍ണമായും മുടങ്ങിയിരിക്കുകയാണ്. രാജ്യവ്യാപകമായി രോഗികള്‍ അനുഭവിക്കുന്ന ദുരിതവും രോഗം തടയേണ്ടതിന്റെ പ്രാധാന്യവും കണക്കിലെടുത്ത് ഇന്ത്യയിലെ തലാസീമിയ രോഗികളുടെ സംഘടനകളുടെ കൂട്ടായ്മയായ ഫെഡറേഷന്‍ ഓഫ് ഇന്ത്യന്‍ തലാസീമിക്‌സ് കഴിഞ്ഞ മാസം 25ന് ഡല്‍ഹിയില്‍ യോഗം ചേര്‍ന്ന് കേന്ദ്ര സംസ്ഥാന സര്‍ക്കാരുകളുടെ അനാസ്ഥയില്‍ പ്രതിഷേധിച്ചിരുന്നു.