കൂത്തുപറമ്പ്: സ്വകാര്യ ബസ് ഡ്രൈവര്‍ കായലോട് പറമ്പായിയിലെ നിഷാദിന്റെ തിരോധാന കേസില്‍ പ്രതി ചേര്‍ക്കപ്പെട്ട പി.എ സലീമിന്റെ ക്രൈംബ്രാഞ്ച് കസ്റ്റഡി കാലാവധി ഇന്ന് അവസാനിക്കും. പത്ത് ദിനങ്ങളിലായി തുടരുന്ന തെളിവെടുപ്പ് നടപടികളില്‍ കേസിന് അനുകൂലമായ യാതൊരു തെളിവും കണ്ടെത്താനായില്ല. സലീമിനെ ഈ കേസില്‍ ചോദ്യം ചെയ്ത് തെളിവെടുക്കാന്‍ കൂത്തുപറമ്പ് ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതി മൂന്നിനാണ് കണ്ണൂര്‍ ക്രൈംബ്രാഞ്ച് സി.ഐ സനല്‍ കുമാറിന്റെ നേതൃത്വത്തിലുള്ള പൊലിസ് സംഘത്തിന് വിട്ടുകൊടുത്തത്.
ബംഗളൂരു പൊലിസിന് മുന്‍പാകെ നിഷാദ് തിരോധാന കേസ് സംബന്ധിച്ച് സലീം നല്‍കിയ കുറ്റസമ്മത മൊഴി പ്രകാരമായിരുന്നു സലീമിനെ നിഷാദ് തിരോധാന കേസില്‍ പ്രതിചേര്‍ത്ത് ക്രൈംബ്രാഞ്ച് അന്വേഷണം തുടങ്ങിയത്. ബംഗളൂരു സ്‌ഫോടന കേസില്‍ അറസ്റ്റിലായ സമയത്താണ് ക്വട്ടേഷന്‍ ഏറ്റെടുത്ത് നിഷാദിനെ കൊലപ്പെടുത്തിയതെന്ന് സലീം വെളിപ്പെടുത്തിയത്. കൊലപാതക കുറ്റം ചുമത്തിയ കേസായതിനാല്‍ കൊല്ലപ്പെട്ടതായി സംശയിക്കുന്ന നിഷാദിന്റെ മൃതദേഹ അവശിഷ്ടങ്ങള്‍, കൃത്യത്തിന് ഉപയോഗിച്ച ആയുധങ്ങള്‍ തുടങ്ങിയ തെളിവുകള്‍ ശേഖരിക്കലായിരുന്ന് സലീമിനെ കസ്റ്റഡിയില്‍ വാങ്ങിയതിലൂടെ പൊലിസ് ലക്ഷ്യമിട്ടത്. എന്നാല്‍ മൂന്ന് ദിവസം സലീമിന്റെ സാന്നിധ്യത്തില്‍ പറമ്പായിയില്‍ ജെ.സി.ബി.യുടെ സഹായത്തോടെ മണ്ണുനീക്കി പരിശോധന നടത്തിയെങ്കിലും യാതൊരു തെളിവും പൊലിസിന് ലഭിച്ചില്ല.
പ്രതിയുടെ സാന്നിധ്യത്തില്‍ തെളിവെടുപ്പ് നടത്തിയിട്ടും തെളിവുകള്‍ കണ്ടെത്താനാകാത്തത് അന്വേഷണം പ്രഹസനമാകുകയാണെന്ന തോന്നലും ആശങ്കയും പ്രദേശവാസികളില്‍ ഉണ്ടായിട്ടുണ്ട്. കേസില്‍ പുരോഗതി ഇല്ലാത്ത പക്ഷം അന്വേഷണത്തിലെ പിഴവുകള്‍ ചൂണ്ടിക്കാട്ടി സമഗ്ര അന്വേഷണത്തിന് ഹൈക്കോടതിയെ സമീപിക്കാനാണ് കര്‍മസമിതി ആലോചിക്കുന്നത്. അതേസമയം കേസില്‍ സലീമിന്റെ കസ്റ്റഡി കാലാവധി നീട്ടി കിട്ടാനും ക്രൈംബ്രാഞ്ച് ഇന്നു അപേക്ഷ നല്‍കിയേക്കുമെന്നും സൂചനയുണ്ട്. 2012 ഒക്ടോബര്‍ 21 മുതലായിരുന്നു സ്വകാര്യ ബസ് ഡ്രൈവറായ പറമ്പായിയിലെ പി. നിഷാദിനെ കാണാതായത്.