കാബൂള്‍: അഫ്ഗാനിസ്ഥാനില്‍ ഭീകരരുടെ ഒളിത്താവളത്തിനു നേരെ നടന്ന യു.എസ് വ്യോമാക്രമണത്തില്‍ 50 താലിബാന്‍ ഭീകരര്‍ കൊല്ലപ്പെട്ടു. മൂന്നു പേര്‍ക്കു പരുക്കേറ്റു. ഖോസ്ത് പ്രവിശ്യയിലെ ഒളിത്താവളത്തിനു നേരെ ശനിയാഴ്ചയാണ് ആക്രമണം. 

മുസാഖില്‍ ജില്ലയിലെ പിരി മേഖലയിലെ പ്രാന്തപ്രദേശത്തായിരുന്നു താലിബാന്‍ ഒളിത്താവളം പ്രവര്‍ത്തിച്ചിരുന്നത്. വെള്ളിയാഴ്ച രാത്രിയിലും ഇവിടെ ആക്രമണം നടത്തിയിരുന്നുവെന്ന് ജില്ലാ മേധാവി ഗുലാബ് മന്‍ഗല്‍ സിന്‍ഹുവ വാര്‍ത്താ ഏജന്‍സിയോട് പറഞ്ഞു. യു.എസ് സൈനിക സഖ്യത്തിന്റെ വിമാനമാണ് ആക്രമണം നടത്തിയത്. കാബൂളില്‍ നിന്ന് 150 കി.മി അകലെ തെക്ക് കിഴക്കന്‍ ദിശയിലാണ് ഈ പ്രദേശം. ഇവിടെ ആയുധങ്ങളും സൂക്ഷിച്ചിരുന്നു. ഇവയെല്ലാം ആക്രമണത്തില്‍ നശിച്ചു.
50 ഭീകരരെ വധിച്ചതായി അഫ്ഗാന്‍ പ്രതിരോധ മന്ത്രാലയവും സ്ഥിരീകരിച്ചു. എന്നാല്‍ കൂടുതല്‍ വിവരങ്ങള്‍ പുറത്തുവിട്ടിട്ടില്ല.