കല്ലമ്പലം: രഹസ്യ വിവരം ലഭിച്ചതിനെത്തുടര്‍ന്ന് പുതുശ്ശേരി മുക്കില്‍ ആറ്റിങ്ങല്‍ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ രാജേഷിന്റെ നേതൃത്വത്തില്‍ നടത്തിയ അന്വേഷണത്തില്‍ ഹോണ്ട സ്‌കൂട്ടറും സീറ്റിനടിയില്‍ ഒളിപ്പിച്ചിരുന്ന അമ്പത് ഗ്രാം കഞ്ചാവും പിടിച്ചെടുത്തു.
മുഖ്യ പ്രതി കടുവാപള്ളി സ്വദേശി സൈഫുദ്ദീന്‍ ഓടി രക്ഷപ്പെട്ടു . ഇയാള്‍ക്കായി തെരച്ചില്‍ ഊര്‍ജിതപ്പെടുത്തി.
പ്രദേശത്ത് കഞ്ചാവ് പോതികളിലാക്കി ചില്ലറ വില്‍പ്പന നടത്തുന്ന ആളാണ് സൈഫുദ്ദീന്‍ എന്ന് എക്‌സൈസ് സംഘത്തിന് വിവരം ലഭിച്ചിട്ടുണ്ട്. ഇയാളില്‍ നിന്നും കഞ്ചാവ് വാങ്ങാനെത്തിയ രണ്ടുപേരെ പിടികൂടിയെങ്കിലും ചോദ്യം ചെയ്ത ശേഷം ബന്ധുക്കളോടൊപ്പം പറഞ്ഞുവിട്ടു. ഇന്നലെ വൈകിട്ട് അഞ്ച് മണിയോടെയായിരുന്നു സംഭവം.
പുതുശ്ശേരിമുക്ക് , കോട്ടറക്കോണം കേന്ദ്രീകരിച്ച് കഞ്ചാവും മയക്കുമരുന്നും വില്‍പ്പനയും വ്യപകമെന്ന് അടുത്തിടെ വാര്‍ത്ത വന്നിരുന്നു. തുടര്‍ന്ന് പ്രദേശം എക്‌സൈസിന്റെ നിരീക്ഷണത്തിലായിരുന്നു. സൈഫുദ്ദീന് മൊത്തമായി വില്‍പ്പനക്ക് കഞ്ചാവ് എത്തിക്കുന്ന കൊല്ലം കേന്ദ്രീകരിച്ചുള്ള സംഘത്തെ കുറിച്ചും എക്‌സൈസിന് സൂചന ലഭിച്ചിട്ടുണ്ടെന്നാണറിയുന്നത്.
വരും ദിവസങ്ങളില്‍ കൂടുതല്‍ അറസ്റ്റ് ഉണ്ടാകും.സര്‍ക്കിള്‍ ഇന്‍സ്‌പെക്ടര്‍ രാജേഷ്, പ്രിവന്റീവ് ഓഫിസര്‍ ബിനു താജുദ്ദീന്‍, സിവില്‍ എക്‌സൈസ് ഓഫിസര്‍മാരായ രാധാകൃഷ്ണ പിള്ള, വിനു എന്നിവരടങ്ങിയ സംഘമാണ് കഞ്ചാവ് പിടികൂടിയത്.