നീലേശ്വരം: മത്സ്യബന്ധനത്തിനിടെ യന്ത്രവല്‍കൃത തോണി തകരാറിലായതിനെ തുടര്‍ന്നു മൂന്നുദിവസം പുറംകടലില്‍ കുടുങ്ങിയ നാലു തൊഴിലാളികളെ രക്ഷിച്ചു. നീലേശ്വരം തീരദേശ പൊലിസ് സ്റ്റേഷന്‍, ഫിഷറിസ് എന്നിവയുടെ നേതൃത്വത്തിലാണ് ഇവരെ രക്ഷിച്ചു തീരത്തെത്തിച്ചത്. ബുധനാഴ്ച ഉച്ചയ്ക്കാണ് ഇവര്‍ മംഗളൂരുവില്‍ നിന്നു മത്സ്യബന്ധനത്തിനു പുറപ്പെട്ടത്. മഞ്ചേശ്വരത്തെ സിദ്ദിഖ്(44), കോഴിക്കോട്ടെ ആനന്ദ്(34), തുംകൂറിലെ അരുണ്‍കുമാര്‍(24), ഹാസനിലെ ദിനേശ്(35) എന്നിവരാണു പുറംകടലില്‍ കുടുങ്ങിയത്. നീലേശ്വരം അഴിത്തല തീരദേശ പൊലിസ് സ്റ്റേഷന്റെ നേതൃത്വത്തില്‍ ഫിഷറീസിന്റെ രക്ഷാബോട്ട് ഇറക്കിയാണു കടലില്‍ 12 കിലോമീറ്റര്‍ ദൂരം പോയി ഇവരെ കണ്ടെത്തി അഴിത്തലയില്‍ എത്തിച്ചത്.