തൃശൂര്‍: പാണക്കാട് മുനവ്വറലി ശിഹാബ് തങ്ങളുടെ നേതൃത്വത്തിലുള്ള മുസ്‌ലിം യൂത്ത് ലീഗ് യുവജന യാത്രക്ക് തൃശൂര്‍ ജില്ലയിലെ വിവിധ കേന്ദ്രങ്ങളില്‍ ആവേശകരമായ വരവേല്‍പ്പ്. 'വര്‍ഗീയ മുക്ത ഭാരതം, അക്രമ രഹിത കേരളം, ജന വിരുദ്ധ സര്‍ക്കാറുകള്‍ക്കെതിരേ ' എന്ന പ്രമേയം ഉയര്‍ത്തിപ്പിടിച്ചുള്ള യാത്രയുടെ ജില്ലയിലെ പര്യടനം കൈപ്പമംഗലം മൂന്ന് പീടികയില്‍ നടന്ന മഹാസമ്മേളനത്തോടെ സമാപിച്ചു.
ഇന്നലെ കാലത്ത് വാടാനപ്പള്ളിയില്‍ നിന്നാരംഭിച്ച യാത്ര തളിക്കുളം, തൃപ്രയാര്‍ എന്നിവിടങ്ങളിലെ സ്വീകരങ്ങള്‍ക്ക് ശേഷം കൈപ്പമംഗലത്ത് സമാപിച്ചു. വഴി നീളെ ആവേശകരമായ സ്വീകരണമാണ് ലഭിച്ചത്. വാടാനപ്പള്ളിയില്‍ മുതിര്‍ന്ന കോണ്‍ഗ്രസ് നേതാവ് വി.എം സുധീരന്‍ ഉദ്ഘാടനം ചെയ്തു. നിയോജക മണ്ഡലം മുസ്‌ലിം ലീഗ് പ്രസിഡന്റ് ആര്‍.എ അബ്ദുല്‍ മനാഫ് അധ്യക്ഷനായി.
ജാഥാ നായകരായ മുനവ്വറലി ശിഹാബ് തങ്ങള്‍, പി.കെ ഫിറോസ്, എം.എ സമദ്, നജീബ് കാന്തപുരം, ഡി.സി.സി പ്രസിഡന്റ് ടി.എന്‍ പ്രതാപന്‍, മുസ്‌ലിം ലീഗ് ജില്ലാ ജനറല്‍ സെക്രട്ടറി പി.എം അമീര്‍, എ.എം നൗഫല്‍ സംസാരിച്ചു.
തളിക്കുളത്ത് നല്‍കിയ സ്വീകരണത്തില്‍ കെ.എ ഹാറൂണ്‍ അധ്യക്ഷനായി. ടി.പി അഷ്‌റഫലി, പി.എം അബ്ദുല്‍ ജബ്ബാര്‍ സംസാരിച്ചു. കൈപ്പമംഗലത്ത് നടന്ന സമാപന സമ്മേളനം മുസ്‌ലിം ലീഗ് സംസ്ഥാന സെക്രട്ടറി കെ.എം ഷാജി എം.എല്‍.എ ഉദ്ഘാടനം ചെയ്തു. ജില്ലാ പ്രസിഡന്റ് സി.എ മുഹമ്മദ് റഷീദ് അധ്യക്ഷനായി. കെ. മുരളീധരന്‍ എം.എല്‍.എ, തോമസ് ഉണ്ണിയാടന്‍, മുസ്‌ലിം ലീഗ് സംസ്ഥാന സെക്രട്ടറിമാരായ കെ.എസ് ഹംസ, സി.എച്ച് റഷീദ്, പി.എം സാദിഖലി, പി.എ അബ്ദുല്‍ കരീം, കെ.കെ അഫ്‌സല്‍ സംസാരിച്ചു.