തിരുവനന്തപുരം: ഇന്ദിരാഗാന്ധി ജന്മശതാബ്ദി ആഘോഷ പരിപാടികളുടെ ഭാഗമായുള്ള 'കാലം മായ്ച്ചാലും മായാത്ത ചരിത്ര ചിത്രം' ചിത്രപ്രദര്‍ശനം കെ.പി.സി.സി അങ്കണത്തില്‍. ഇന്ദിരാഗാന്ധിയുടെ ജീവചരിത്രം സമഗ്രമായി പ്രതിപാദിക്കുന്ന ഫോട്ടോ പ്രദര്‍ശനത്തില്‍ പ്രദര്‍ശിപ്പിച്ചിരിക്കുന്ന 400 ഓളം ചിത്രങ്ങളിലൂടെ കടന്നുപോകുന്ന കാഴ്ചക്കാരിലേക്കെത്തുന്നത് ഇന്ദിരഗാന്ധിയുടെ പരിപൂര്‍ണ ജീവചരിത്രമാണ്. ആകാശവാണിയിലൂടെ അടിയന്തരാവസ്ഥ പ്രഖ്യാപിക്കുന്ന ഇന്ദിരഗാന്ധിയുടെ ചിത്രവും ഗാന്ധിജിക്കൊപ്പമുള്ള ചിത്രങ്ങളും സ്വാതന്ത്രദിനാഘോഷത്തില്‍ ഇന്ദിരാഗാന്ധി നര്‍ത്തകര്‍ക്കൊപ്പം നൃത്തം ചെയ്യുന്ന ചിത്രങ്ങളും ഏറെ ജനശ്രദ്ധ പിടിച്ചുപ്പറ്റി.
ഐക്യരാഷ്ട്ര സഭയിലെ പ്രസംഗം, ഗുരുവായൂര്‍ ക്ഷേത്ര ദര്‍ശനം, കുടുംബവുമൊത്തുള്ള ചിത്രങ്ങള്‍, ജവഹര്‍ലാല്‍ നെഹ്‌റുവിന്റെയും സഞ്ജയ് ഗാന്ധിയുടേയും മരണാനന്തര ചടങ്ങുകളില്‍ പങ്കെടുക്കുന്ന ഇന്ദിരാഗാന്ധി, മദര്‍ തെരേസ, ഫിഡല്‍ കാസ്‌ട്രോ, ഹരോള്‍ഡ് വില്‍സണ്‍, ദലൈലാമ, സുല്‍ഫിക്കര്‍ ഭൂട്ടോ, ബേനസീര്‍ ഭൂട്ടോ തുടങ്ങിയവര്‍ക്കൊപ്പമുള്ള ചിത്രങ്ങളും പ്രദര്‍ശനത്തിലുണ്ട്.
ഇന്ദിരാഗാന്ധിയുടെ ജീവിതത്തെ ആസ്പദമാക്കി ബി.എസ് ലക്ഷ്മി രചിക്കുന്ന പുസ്തകത്തിനായി ശേഖരിച്ച ചിത്രങ്ങള്‍ക്കു പുറമേ കേരളത്തിലെ എല്ലാ ജില്ലകളിലേയും പ്രവര്‍ത്തകര്‍ നല്‍കിയിട്ടുള്ള ഇന്ദിരാഗാന്ധിയുടെ അപൂര്‍വ ചിത്രങ്ങളും പ്രദര്‍ശനത്തില്‍ ഉള്‍പ്പെടുത്തിയിട്ടുണ്ട്. പ്രദര്‍ശനം പത്തിന് സമാപിക്കും.